Келн-улсин музейд соньн һәәхүлмүд секгдв

“Хаврин теегин цецгүд”. “Сәәхн күүкд күүнә дүр”. Иим нерәдлһтә хойр һәәхүл Пальмовин нертә келн-улсин музейд секгдв. Шин һәәхүлмүд Мартын нәәмнд — күүкд улсин нарта-делкән сән өдрт нерәдгджәнә.

“Цветы и яблоки”, “Весна 45-го”, “Пионы”, “Подсолнухи”. Ут-тоодан “Веснний букет” һәәхүлд хөрн көдлмш тәвгдв. Элст балһсна бәәрн күүкд күн Анна Маштыкован келсәр, эдн цугтан янзарн болн техникарн йилһрнә. Хальмгин зурачнр Убуш Бадмаевин, Светлана Деликован үүдәсн цецгүдин натюрморт хаврин бәәдл үзүлж, дуан ирснь медүлжәнә.

Анна Маштыкован келсәр, һәәхүл эднд йир икәр таасгдв. Күүкд улсин нарта-делкән байрт нерәдсн һәәхүл йир соньн. Йир ке-сәәхн көдлмш тәвгдж. Цуг зургуд таасгдв. Цецгүд әмд болж медгднә.

Мартын нәәмнә байрин өмн өргнд музейин көдләчнр дәкәд нег белг белдв. Эннь Хальмгин нертә зурачнр Ольдаевин, Санагджиевин, Поваевин, Ошлановин күүнә зургудын һәәхүл. Эн һәәхүлин иим ухан-санан шүүж авгдснь бас учрта. Хаврин байр цуг әмтә тоот шинрж, сергснә темдг болсн деерән, сәәхләсин цецгәрлтлә өөрхн залһлдата. Һәәхүлд тәвгдсн үүдәврмүдт олн-зүсн наста, олн-зүсн эрдмтә күүкд улс зурата. Тер тоод СССР-ин ачта артистк Алевина Кекеева, Әрәсән олн-әмтнә артистк Валентина Горяева, Хальмгин шүлгчнр Бося Сангаджиева, Вера Шуграева. Ут-турштан хөрн көдлмш үзж болх.

“Весенний букет” болн “Красивой женщины портрет” нертә һәәхүлмүд музейд мартын чилчг күртл көдлх.

Ээнән Делгр, Очра Сергей