Келн-улсин музейд шин һәәхүл секгдх
“Во имя Отечества”. Нег минһн нәәмн зун арвн хойрдгч жилин дәәнд нерәдгдсн иим нерәдлһтә һәәхүл удл уга Пальмовин нертә келн-улсин музейд секгдх. Экспонатмудыг Тенгин хазгудын туужин Новочеркасск балһсна музей авч ирв. Ода һәәхүлд белдврин көдлмш гүргүдән.
Эн арвн негнь көдлмшин зокьялчнь — нертә зурач Иван Крылов. Эн күн хальмгуд дун кесг жилдән хамдан бәәсмн. Мана келн-улсин авьяс-зангшал сәәнәр медж авв. “Хальмгин ишкә гермүд”, “Хурул”, “Нүүдлин салькн” болн талдан чигн үүдәврмүдиг зурсмн. Энүнә зургуд хәләхлә, хальмг улсин бәәдл-жирһл болн бәәциг сәәнәр үзүлсинь темдглх кергтә.
Пальмовин нертә келн-улсин музейин көдләч Светлана Оконован келсәр, им зургуд мана келн-улсин туужиг үзүлжәх үүдәврмүд болжана. Зурачин үүдәврмүд келн-улсин хувц-хун ишкә гермүд болн хальмг дәәчин зер-зев медж авхд сән нилчән күргнә. Оконован келсәр, нертә зурачин үүдәврмүдт үзүлсн детальмуд шинжләчнрт болн номтнрт соньн болх зөвтә. Онц темдглхд, һәәхүлд тәвгдх зургуд цугтан экн-түрүн үүдәвр болжана. Урдк жилмүдт өвәрц үүдәврмүд геедрж одв. Тегәд Новочеркасск балсһнас авч ирсн зургудас хальмг улсин туужин халхс шинәс босхж авч болх.
Тенгин хазгудын туужин Новочеркасск балһсна музейяс авч ирх хуранһу күцц биш. Болв урднь дегтрмүдәс медж авсн детальмудыг ода зургудт эврәннь нүдәр үзж болх. Тер тоод гелнгүдин хувцн — эрнһ болн шажна шар махла. Тер мет һәәхүлд дегтрмүд болн хойр цергә туг — һурвдгч Тенгин полкин тугмуд үзж болх. Һәәхүлин бүрдәһәчнрин келсәр, секгдх шин һәәхүл олн улст соньн болх зөвтә. Энүнд хальмг улсин әрүн зөөр үзүлгдх. Музейин көдләч Мария Дорджиеван келсәр, хальмгин соньн туужин тускар олн әмтн шин медрл авч чаджана.
Пальмовин нертә келн-улсин музейин әнгин һардач Мария Дорджиеван келсәр, Новочеркасск балһснас ирсн һәәхүлд мана музейин экспонатмуд немдгдх. Юнгад гихлә тендәс дала ик предметмуд авч иршго. Хамгин һол төрнь — цергә туг хәрү төрскн һазртан хәрж ирсн йовдл байрта керг. Арвн йисдгч зун жилин чилгчәр болн хөрдгч зун жилин эклцәр зургуд хуучрад бәәж, фотозургуд харнһу болж одв. Тер бийнь һәәхүл йир соньн болх зөвтә.
Шин һәәхүл байрин бәәдлд августын нег шинд секгдх. Эн жилин чилгч күртл танһчин әмтн болн гиичнр билгтә орсин зурач Иван Крыловин өвәрц экн үүдәврмүдиг һәәхж чадхмн.
Ээнән Делгр, Мятежный Максим
