Келн-улсин музейд хальмг күүкнә өвәрц зург үзүлгджәнә

Хойр зун жилин туршарт «Портрет калмычки Аннушки» нертә зург олн улсин нүд байрлулна. Ода түрүн болж Пальмовин нертә хальмгин келн-улсин музейд Ивана Аргуновин зурсн портретиг үзж болхмн.

Нег минһн долан зун жирн доладгч жилд Аргунов эврәннь хамгин ке-сәәхн үүдәврән — хальмг күүкн Аннушкин эс гиж Анна Николаевнан зург зурсмн. Хальмг күүкн Шереметьевин авалин сурһульч бәәж. Тер цагт авальнь сәәһән хәәж одсн бәәж. Үүдәврт Аннушка эврәннь өнгрсн эзн күүкд күүнә зургинь һартан бәрж хәләһәчнрт үзүлжәнә. Соньн зургт хальмг күүкнә үнн-чик дүр медүлгджәнә. Бичкдүдин зургудас эн үүдәвр өвәрц чинрәрн йилһрнә. Цевр сәәхн хәләцтә, шарвтр чирәтә хальмг күүкд күүнә нүдтә өкәр күүкнә дүр үзүлгджәнә.

Графиня Варвара Алексеевна сәәһән хәәсн хөөн хальмг күүкиг граф Петр Шереметьев харж хәләв. Энүг өнгрснә хөөн эднә көвүн Николай Аннушкд туслжм күргдг болв. Николайин зөвшәләр, дворянин Петр Фатьяновд Анна одад, өрк-бүлән тогтав. Харул-хааһул болсн улсан күндләд, эврәннь үрдүдтән Варвара болн Петр гисн нер өгч. Ода нертә зург Элст балһснд ирв. Түрүн болж энүг хәләсн улс дунд Приютненск района сурһульчнр болв. Хальмг күүкн Аннушкин зург яһж үүдәснә туужин туск келвр эдн ик оньган өгч сонсв. Эннь бас учрта. Юнгад гихлә, дорас өсж йовх баһчуд түрүн болж арвн нәәмдгч зун жилин орсин дүрслгч искусствин хамгин ик чинр зүүжәх үүдәвр хәләж чадв.

Зург хәләчкәд баһчуд невчк үүмсн бәәдл һарв. Эдн удандан өвәрц үүдәвр хәләһәд, уха тунһаһад бәәв. Келхд, соньн үүдәвр үүдәснәс авн энүг Москва балһснд бәәх Шереметьевин бәәшнг Кусково нертә герәс холд авч һарад уга. Онц темдглхд, Аргуновин зург Шереметьевин үрдүдин зургудла хамдан нег залд үзүлгднә. Юнгад гихлә, Аннушкиг Шереметьевин өрк-бүлд энкрләд, икәр дурлдг бәәж. Графиня Варвара Алексеевна, граф Петр Шереметьевин, Аннушкин ах Жамб гелнгин бичгүд ода күртл хадһлгджана. Хальмг күүкиг харж хәләсж йовсн улс бичгтән Анна Николаевнад бүлән жөөлн үгмүдән нерәдж.

Ээнән Делгр Колдан Церн