Келн-улсин музейд цаажла харһсн улст нерәдгдсн һәәхүл көдлжәнә

Цаажлгдсн болв чигн, зовлнгд даргдсн уга. Иим нертә һәәхүлд цаажла харһсн улст нерәдгдсн хальмгин зурачнрин үүдәврмүд болн Чеченск республикин бичкдүдин зургуд үзж болх. Эн өдрмүдт Пальмовин нертә келн-улсин музейд киитн Сиврт күзүцә золвнг үзсн улс болн бичкдүд ирәд, тер һашута цагин туск зургуд һәәхжәнә.

Арвн долан наста Александра Эрендженован келсәр, иим һәәхүл хәләхин төлә Целинн района Деед Яшкуль селәнәс ирв. Энүнә темдглсәр, хальмг улсин һашута туужин тускар хол Сиврт дааж болшго зовлнг үзсн эврәннь ээж-аавиннь келж өгснәс меднә. Александра Эрендженова келсәр, мана ээж-аавнр талын һазрт ик зовлнг үзж. Зәрмдән иддг хот уга болдг бәәж, нег үлү күнд көдлмш кех кергтә билә гиж көгшдүд тодлна.

Александран келсәр, Хальмгин нертә зурач Очр Кекеевин үүдәсн Хальмгин хотн нертә зург хамгин икәр таасгдв. Чеченск республикин бичкдүдин художественн школын сурһульчнр Пальмовин нертә музейд эврәннь үүдәврмүдән, аквареляр зурсн тавн зург белглв. Чечнян, Ингушетин, Балкарин болн Карачаевин келн-улс бас сталинск цаажла харһсмн.

Тер мет зургудын галерейд хальмг улсин һашута туужин халхд нерәдгдсн дөчн зург бәәнә. Эннь “Күүкд күн дәәнә цагт”, “Поезд йовж йовна”, “Экин һашудл”, “Келн-улсин хортн” нертә үүдәврмүд олна оньг авлна. Эн зургүд киитн харнһу өнгтә ширәр зургдж. Тегәд чигн цаажин цагиг сәәнәр үзж медж болх.

Зурач Валерий Леджинов цөн жил хооран музейд эврәннь зурсн “Одна”, “Калмыцкая мадонна”, “Этап” нертә зургудан белглсмн. Тер мет һәәхүлд Иван Чмеревин үүдәсн “Декабрь-4З. Депортация” болн Тимур Цотхлоновин “Суровый декабрь” нертә зург бас һәәхүлд үзж болх. Цаажлгдсн болв чигн, даргдсн уга нертә һәәхүл январин арвн нәәмн күртл көдлх.

Ээнән Делгр, Очра Сергей