Казахстанд хальмгуд тууврт яһж бәәсмн?
Калмаки. Иим бәәрн хасгуд Аральск балһснд нүүлһсн хальмгудыг нерәддг бәәж. Күчәр нүүлһснә нег пункт — Казахстан бәәж. Хол һазрт бәәх Аральск балһсн цаажла харһсн хальмгудын хойрдгч төрскн һазр болв. Мана үүдәгч баг Аралд көдлмшин кергәр ода ирв. Тер цагин тодлврмудар мана зәнгч Батан Санжирмала бәәрн улс хувалцв.
Аральск балһснд хальмгуд ирснә тус к зәнг агшчмин зуур тархагдв. Хальмгин үүдәчг баг хам хоша бәәх Тамара Мелихован өрк-бүлд бәәсн тускар сосчкад, эдниг эврән хәәж авв. Найн тавн наста Тамар Кузьмична хальмгудла кег жилдән хамдан көдлсн цагиг бүлән үгмүдәр тодлна. Тер цагт энүнә тодлсар, москолвск областяс тууврт ирнс баһ наста специалистыг портын экономистын цолд авч. Тер цагт күүкн әрә гиж хөрн нас зүүсмн.
Казахстана Аральск балһсна бәәрн күн Тамара Мелихован келсәр, хальмгуд йир дааврта көдләчнр билә, эднә тускар му үгмүд келдго бәәсмн. Бухгалтерин дарук болж Йот Наставич Давугинов көдлв. Бухгалтер болж Доржина Нюся көдлв. Эднә көдлмшин тускар дуту-дундс уга бәәсмн. Эн һазрт Аральск порт бәәсмн. Эн порт Чарджоу балһсна медлд бәәсмн. Сән көдлмш кеснә төләд Чикеев Сергей Наранович параходствин заллтд орж көдлв, тенд өнгрж гиж сонсж. Бухгалтерт Дорджиева Мария көдлжәсмн. Эдниг цугтаһинь сәәнәр тодлна.
Энүнлә хамдан бухгалтерт Санака Дагинов көдлж йлвсн бәәж гиж эн тодлна. Баһ наста, әмтнлә ээлтә күн энүнә тодлврт мөкинд үлдв. Санка Дагиновин хамгин дурта дууна хойр халхинь ода күртл Тамара Григорьевна сәәнәр тодлна.
Тамара Мелихова хол һазрас ирсн гиичнриг кесгтә тәвхәр седсн уга. Эврәнн баһ цагтан үүрлж йовсн улсин тускар медж авхар седв, эдн ода яһж бәәхин тускар медж авхар седв. Ода хальмугд яһж бәәхин тускар соньмсв. Аральск балһсн энүнд йоста төрскн һазр болв. Энд өрк-бүлән тогтав. Дөрвн үрнә өскәд, көл деернь босхв. Энүнә өөрнь авальнь бәәнә. Мана үүдәгч багин тосж авсна хөөн, хальмг кел сәәнәр меддгән үзүлв.
Казахстанд хальмгуд бәәрн улсла ни-негн бәәснә тускар Аральск балһсна бәәрн улсин тодлврмуд ил герч болжана. Санка Дагиновин жирһлин хаалһ цаарандан ямр болсн тускар Элст балһснд ирснә хөөн мана үүдәгч баг медж авв. Ода Санка сәәһән хәәсмн. Энүнә дү көвүнә көвүн Виталий Аральск балһсна тускар бичкн цагасн авн сонсж йовсмн. Энүнә авһнь болн эцкнь Казахстан балһснд нүүлһсн бәәж. Виталин келсәр, энүнә авһнь Санка тууврас хәрж ирәд, эврәннь дурта эрдмәрн бухгалтерин халхар көдлв. Энүнә хөөн махна болн үснә промышленностин министерствд көдлсмн. Ода энүнә элгн-саднд Санка йоста бахмж болжана. Санка Дагинов сүркә дәәнд орлцад, дөчн йисдгч жилд Австряс гвардии сержант цолта дәәч Казахстана Аральск балһснд тууврт бәәсмн. Энүнә өөдән ачлврмудыг тер тоодж за отвагу медалиг Виталий ода күртл әрүнәр хадһлжана.
Виталий Дагиновин келсәр, зәрм хасгуд хальмгудла сән хәрлцә бәрж бәәсмн, эдниг ах-дү кевәр нерәдж бәәсмн, хоорндан ни-негн билә. талдан хасгуд эдниг хортн гиж тоолдг бәәж. Ах-дү гиж тоолдг хасгудын тохмд хальмг күүкд улс бәәж. Терт цагт эднә бәәдл-жирһл иим бәәсмн.
Арвн һурвн жилин күнд зовлнгиг зәрм улс дааж чадсн уга. Хол һазрт күзүцә зовлнг дааж һарсн улс ода күртл Аральск балһсна улст ик ханлтан өргжәнә. Тууврин күнд цавгт эдн хальмугдт ик дөн күргсмн.
Батан Санжирма, Очра Сергей
