Капитальн ясврин санг бүрдәгдх
Иргч жилд Хальмгт олн патьрта гермүдт капитальн ясвр кехин төлә эздүд сар болһн нег дөрвлжн метрт тавн арслнг хөрн деншг орулж өгх зөвтә. Танһчин правительствин закврар, олн патьрта гермүдт капитальн ясвр региональн санг бүрдәгдв. Некоммерческ чинртә шин организац әмтнә мөнг цуглуж авад, энүг шишлнг счетд хадһлад, капитальн ясврин танһчин программ бүрдәлһнд орлцх, марһа давулх, ясврин көдлмш бүрткж хәләх. Гермүдин эздүдин орулж өгсн мөнгнхс иштә ясврин көдлмш кегдх. Тер мет шин санг федеральн болн региональн бюджетмудас ирсн мөнг олзлж чадх. Әмтнәс цуглулж авсн мөнгн зуг капитальн ясврт олзлгдх зөвтә. Эздүдин тоолврар, цуглрсн мөнгн эднә бәәсн герин счетд орж ирх зөвтә. Эврәннь герт капитальн ясврин санг тогталһна эв-арһ эврән шүүж авх. Энүг иргч жилин март сарин нег шин күртл кех зөвтә. Кемр иим шүүвр эс кехлә, иим санг региональн оператор эврән бүрдәх.
