Күндтә донормудт өгдг мөнгнә нег жилин кемжән арвн минһн арслнгд күрх
Күндтә донормудт өгдг мөнгнә нег жилин кемжән арвн минһн арслнгд күрх. Энүнә тускар Госдумин депутатнр зака батлж авв. Шин закан иргч жилин январин нег шинәс авн үүлдврт орх зөвтә. Хальмг танһчд донормудт өгдг мөнгнә кемжән невчк ик болх. Өдгә цагт мана танһчд йисн зун найн йисн күндтә донор бәәнә. Эднәс хөрн дөрвн күн иим күндтә нер эн жил зүүв. Дәкәд нег тодлад келхлә, күндтә донор болхин төлә дөч дәкж цусан өгх кергтә эс гиж жир дәкж цусна плазм өгх зөвтә. Болв эврә дурар цусан өгх улсин то жил ирвәс баһрад йовна. Эн төрәр цааранднь мана зәнгч Аджин Светлана келжәнә.
Эндр өдрәс авн Баатр Бакланов Әрәсән күндтә донор болжана. Баатр Баклановин тоолврар, иим күндтә нер зүүхд ачта болн әәмшг уга болна. Тер иим нер зүүснд олз-туста болжана. Әрәсән күндтә донор Баатр Баклановин келсәр, цусан хойр минһдгч жиләс авн өгчәнәв. Ут-тоодан дөч дәкж цусан өгв. Эннь мини гражданск даавр болжана гиж Баатр келнә.
Менгиян Ареев болхла Баатр Баклановас кесг жилдән цус өгчәнә. Урднь эн кергт олн улс орлцдг билә. Ода болхла жил ирвәс цусан өгх саната улсин то баһрда йовна гиж Менгиян Ареев тоолжана. Энүнә келсәр, цуг әмтн нег-негндән дөн болх зөвтә. Зеткртә йовдл күләлго, эврә дурар стандц ирәд, цусан өгх кергтә.
Шин жиләс авн цус олн улс өгхин төлә о донорстве крови и ее компонентов нертә заканд сольвр орулгдх зөвтә. Ямаран сольвр орулгдхин тускар танһчин эрүл-менд харлһна министерствд цәәлһж өгв. Хальмг танһчин эрүл-менд харлһна болн социальн делгрлтин министрин дарук Любовь Джексембекован келсәр, ода донормуд нег жилд йисн минһн йисн зун тәвн нәәмн арслнг өггднә. Шин жиләс авн арвн минһн арлснг авдг болх. Дәкәд болхла иим улс ямаран чигн цагт амрлһнд һарч чадх, чеерүд угаһар больницд бийән эмнүлж чадх, хойр өдртән амрх закан бәәнә.
Специалистнрин тоолврар, шин заканд һол оньг әәмшг уга бәәлһнд тусхагджана. Энүнә төлә цусна нег государственн банк бүрдәгдх. Энүнә дөнгәр ямаран чигн багин цус олж авч болх. Үлгүрнь, талдан регионд кергтә цусн бәәхлә, тендәс авч ирх арһ бәәнә. Иим кевәр кесг әмт харсж авч болжана. Цусна цутхлнгин специалист Баатр Анюшевин келсәр, эрүл-менд харлһна келн-улсин программар өдгә цагин некврлә ирлцәтә зун һунч зурһан сай арслнга оборудовань хулдж авгдв.
Тер мет цусна нег банкд цусан өгч чадшго улсин нерд орулгдхмн. Дәкәд болхла цусан мөнгнә төлә өгчәх әмтн бас тоод авгдх.
