Күн болһн ухаһан чикләд, өршәнһү седклтәһәр бәәх зөвтә гиж Дала лам гегән зәрлг болв
Әрәсән болн талдан орн-нутгин буддистнрин то жил ирвәс өсәд йовна. Мана өдгә цагин бәәдл-жирһлин хаалһд учрдг күнд бәәдлин һол учрнь — күн болһн ухаһан чикләд, өршәнһү седклтәһәр бәәх зөвтә гиж Дала лам гегән зәрлг болв. Энүнә тускар Дармсала балсһнд Әрәсән буддистнрин төлә болсн ном-сурһулин йовудт келв. Дала лам гегәнә темдглсәр, урднь бийән буддистнр гиж нерәддг әмтн нурһлж зуг әдс авад, олн-зүсн мөргүлмүдәр соньмсад, буддизмин ном дасдго билә. Ода болхла жил ирвәс эн туст бәәдл сольгджана, эннь сән темдг. Буддийск дамшлт күцәсн әмтн гүн уха тунһаж, эврән шинжлт кех зөвтә гиж нарта-делкән буддистнрин оюни һардач келв. Мана жирһлд учрдг зовлнг — мана ухан. Энүг яһж чиклхмн? Бурхн Багшин гегәнә үлдәсн гүн ном дасад, эврәннь му ухан-санаһан чиклх кергтә. Буддизмиг даслһн ик чинртә төр болжана гиж Дала лам гегән зәрлг болв.
