Өвәрц эрдмтә күүкн соньн кегдлүмд кежәнә

Күрл мөнгн уулын эзн күүкд күн. Иим нер мана сюжетд келгджәх күүнд өгч болх. Эн күн өвәрц эрдмтә. Эрднь үнтә чолу цуглулна. Зуг энүг кеерүл гиж цуглулжахш. Күүкнә нерн бас өвәрц. Цуглулсн эрднь чолуһас ке-сәәхн цугла тогтана.

Иим ке-сәәхн багла Лейла Сандшико бүкл хуранһу цуглулв. Энүнә келсәр, иим өвәрц үүдәлт күцәхд Париж балһсн ик урмд өгв. Бичкнәсн авн одхар санжасн париж балһснд генткн одв. Дизайнер Сандшиког орсин модын долан хонгин байрт дуудв. Тенд олн-зүсн ке-сәәхн тоот үзв. Иим йилһән сәәхн тоот үзсн Лейла бас иим кевәр энүнә өөр бәәх улс бәәх зөвтә гиж ухалв. Ухан-санан эврән ирв. Түрүләд олн-зүсн кеерүләс болн эрднь чолунас багла кедг болв. Иим белг өвәрц болн соньн болна.

Лейла Сандшик келсәр, әмд цецгүдәс ке-сәәхн юмн уга. Тегәд иим багла кех дурн күрв. Иим багла мөнкинд үлдх. Эн өдрин тускар тодлулх.

Иим ке-сәәхн багла кехд олн-зүсн харһлт болн зуульчлһн урмд өгнә. Лейлан келсәр, эн баглад Таиландын сәәхн йиртмж орв. Орхидея цецгүдин “Нунг Нуч” нертә бүкл сад зүркнд удандан төөнрж үлдв. Энүнд шовуд дегд ке-сәәхн. Энүнә хуранһуд цевр усна дусал мет сәәхн багла бәәсмн.

ейла күүкнд фен-шуй эрдмчин селвгүд ик чинртә болна. Келхд, фэн-шуй эрдмч энүнә баглаг байн зөөврин сав гиж нерәднә. Иим баглан төгрг янзнь болн үнтә кеерүл эрдмчин тоолврар, байн зөөрин күч татж авна.

Кемр өрк-бүл тогтасн баһчуд баглад эврәннь өрк-бүлиннь үнтә зөөр дүрхлә, Лейла зөвшәрх. Иим багла өрк-бүлин тууж хадһлхла улм сән болн соньн болх гиж эн тоолжана. Иим баглаг баһчуд эврәннь өвкнриннь евәл гиж хадһлх.

Лейла Сандшик келсәр, энүнә кесн багла мөнкинд үлдх. Эдниг үйәс үйд өрк-бүлин үнтә зөөр гиж үлдәж болжана.

Лейла Сандшик келсәр, дурта көдлмшән кехлхрн бийән илвтә күн гиж тоолна. Тегәд чигн энүнә урн һарар кесн кегдлмүд йир ке-сәәхн болна.

Чучян Валентина, Хулхачин Николай