Өнчн бичкдүдин төрмүд хаһлх программ күцәгджәнә
“России важен каждый ребенок». Шин программ өнчн бичкдүдиг харсж, эдниг өрк-бүлмүдт авлһнд нөкд болх. Ода Хальмг танһчд эн төсв экләд күцәгджәнә. Эн төрәр болсн төгрг ширән сүүрт иргч үүлдврин зуран тускар күүндвр кегдв.
Партийн төсвин зүүцүләч Хальмгин олн-әмтнә хуралын депутат Ирина Глушко статистикин то-диг зәнглжәнә. Ода Хальмг танһчд нег минһн найн зурһан өнчн болн эк-эцкин хәләвр уга үлдсн көвүд-күүкд бәәнә. Эднәс зун найн зурһань государственн учрежденьсин теткврт бәәнә. Иим учрежденьст бичкдүдин төлә цуг кергтә бәәцин болн талдан чигн таал бүрдәгдх зөвтә. Ирина Глушкон келсәр, өдгә цагт ончн бичкдүдиг көвүшлж авлһна төрт ик оньг тусхах кергтә болжана. Партин күцәжәх төсв «Россия без сирот» нертә федеральн программин ик чинртә хүвнь болжана.
Ирина Глушкон келсәр, ода дөврн зун тәвн йисн көвүд-күүкд өрк-бүлмүдт бәәнә. Эднәс һурвн зун йирн хойр бичкдүд көвүшлж авгдв. Найн зурһан ончн бичкдүд шишлнг гер-интернатд бәәнә. Эднәс долан инвалид. Давсн жилд нег чигн инвалид бичкдүд көвүшлж авгдсн уга.
«России важен каждый ребенок» нертә программ күцәлһнә туст кегдх керг-үүлдврмүдин тускар эрдм-сурһулин министрин дарук Раиса Дякиева келж өгв. Энүнд Дякиева һол зөрүлт йилһж темдглв. Энүнә тоолврар, өрк-бүлмүдт бичкдүдт сән таал бүрдәгдх зөвтә.
Министрин дарук Раиса Дякиеван келсәр, жирлһин күнд бәәдлд туссн өрк-бүлмүдлә, тер тоод баһ наста ш.өрк-бүлмүдлә көдлмш күцәх кергтә. Эднә өрк-бүлд цуг кергтә таал бүрдәхд дөн болхла сән болх. Тиигхлә өнчн бичкдүдин то баһрх.
Раиса Дякиеван келсәр, өрк-бүлин институ батрулһнд эрдм-сурһулин халхд психолого-педагогическ дөн күргдг цутхлнг ик тәвцән орулх зөвтә. Эн организац эврәннь үүлдврән одахн эклсн билә. Тер бийнь энүнә көдләчнр жирһлин күнд бәәдлд туссн өнчн бичкдүдиг өрк-бүлдән авад өскх эк-эцкнрлә олз-туста көдлмш бүрдәж күцәжәнә.
Төгрг ширән сүүрин орлцачнр өнчн бичкдүдин болн эдниг хәләврт авсн улсин социальн харслһна немр керг-үүлдврмүдин тускар тодрха күүндвр кев. лайф Раиса Дякиеван темдглсәр, көвүшлж авсн эк-эцкнрт немр мөнг өгхин тускар министерств шиидвр батлж авла. Ончн бичкдүдиг көвүшлж авсн эк-эцкнрт хөрн минһн арлснг өггдх, инвалид көвүд-күүкдиг көвүшлж авсн улс һучн минһн арслнг авхмн.
Сүүрт дәкәд нег хурц төр хәләгдв. Социальн учрежденьсас һарчах нег минһн зун һучн зурһан көвүд-күүкдиг бәәдг гермүдәр теткх кергтә. Давсн жилин чилгәчр олн-әмтнә хурал эн туст ирлцнһү зака батлж авла.
Хуралын батлж авсн зака күцәхин төлә танючин правительств эн жил шишлнг жилишн санг бүрдәх зурата. Эрүл-менд харлһна болн социальн делгрлтин министрин дарук Любовь Джексембекова талдан нег төрт онц оньг тусхав. Социальн учрежденяс һасрн баһчудла залһлда бәрж, асрмжин болн хәләврин органмуд иим бчикдүдиг мартх зөв уга.
«России важен каждый ребенок» нертә программин көдлмшч багин гешүд эн халхар күцәх керг-үүлдврмүдин зуран тускар дәкәд нег харһад күүндхәр шиидв.
Чучян Валентина, Настан Сергей
