Әәдрхнд Өмн үзгин парламентск ниицәнә дарани ик хург болв
Әрәсән Өмн үзгин парламентск ниицәнә арвн доладгч конференцин шиидврмүдт федеральн округин депутатнр икәр нәәлжәнә. Иим ик хург Әәдрхн балһснд болв. Энүнд Өмн үзгин нәәмн парламентин делегац орлцв. Ут-тоодан эдн арвн йисн төрмүдәр күүндәд, шиидврмүд батлж авцхав.
Ижл һолын көвәд бәәх тавн зун жилин туужта Әәдрхн балһснд конференц болв. Нааран нәәмн парламентин делегац эврәннь селвгүдән, седвәрән авч ирж күүндвр кев. Энүнә өмн цуг төсвсиг парламентин делегацсин толһачнр Көк тенгст Корчагина нертә платформд хәләһәд, батлж авцхав. Конференцин һардсн Александр Клыканов депутатнриг Әәдрхн балһснд дуудснь бас учрта. Энүнә темдглсәр, ода һазрин көрнг олзлжах орн-нутгудын то өсв. Тегәд Әрәсән энергетическ болн келн-улсин әәмшг уга бәәлһ тетклһнә төлә иим төр хаһлх кергтә цаг ирв. Стратегическ көрнг олзлһна зөвиг нерән һутасн компаньс болн иим көдлмш меддго әмтн авх зөв уга. Ода эн төр Астраханск областьд, Краснодарск крайд болн Хальмг танһчд ик чинр зүүжәнә. Эн регионмуд тенгсин көвән ик аһу эзлжәнә.
Тегәд энүг эзни кевәр олзлх кергтә болжана. Конференцин йовудт делегацсин гешүд эврәннь комитетмудар хувагдж көдлв. Эннь мастер-класс кеснлә әдл болв. Бюджетин, экономическ политикин, арһлачнрин болн зөөрин төрмүдин ЮРПА-н комитетин сүүр хамгин дуан болв. Энүг Хальмгин олн-әмтнә депутат Эрдни Гагуев һарджана. Комитетин сүүрт батлж авсн селвгүд ЮФО-н ханьд оржах субьектмудын болн Әрәсән талдан регионмудын экономикин бәәдл ясрулх зөвтә. ЮРПА-н комитетин ахлач Эрдни Гагуевин келсәр, ода дөрвн зун һучн һурвн сай арслнг ору геедржәнә, энүнәс һурвн зун йирн зурһан сай магистральн турваһас көлтә геедрнә.
Ростовск областин болн хальмг танһчин үлгүрт Әрәсән Федерацд эрдм-сурһулин туск федеральн закана төсвәр зүткәтә күүндвр болв. Әәдрхн балһснд болсн арвн доладгч ЮРПА-н конференцин ашт Әрәсән Өмн үзгин нәәмн парламент шиидврмүд батлж авв. Тер тоод селәд-поселксиг харлһсна керг-үүүлдврмүд чанһах, межбюджтен хәрлцә ясрулх, хазгудын кадетск эрдм-сурһуль делгрүлһнә төрмүд шиидврт орулгдв. Хальмгин олн-әмтнә хуралын ахлач Анатолий Козачко келсәр, ода федеральн структурмудын үүлдврин төр босгджана. Иим организацс бәәрн парламентд тооца өгх селвг Хальмгин депутатнр орулж өгв.
Цуг энүг Әрәсән Государственн Думин депутатнр шинжлх. Әрәсән Өмн зүгин парламентск ниицән арвн жил хоороан тогтла. Эн цагин эргцд эн ниицән ни-негн чидлән негдүләд көдлхлә, Әрәсәд кегджәх хүврлтд бас үлмәһән күргж чадхан медүлв. Әрәәсн Өмн үзгин парламентмүдин дарани харһлт бас Әәдрхн балһнд цөн сар болад болх.
Хавтхна Элла, Очра Сергей
