Әрәсән телеканалд "МУР" нертә олн серийта фильм экләд үзүлгджәнә
Әрәсән телеканалд МУР нертә олн серийта фильм экләд үзүлгджәнә. Энүнд Төрскән харсгч дәәнә цагт Москван уголовн хәәврин көдләчнрин көдлмшин тускар келгджәнә. Сүркә дәәнә кемд мөшкәчнр баатр-зөрмг кевәр дәәлдәд, төрскән харсла. Эднә үүлдвр бас ик әәмшгтә бәәсмн. Элстин бәәрн улсин келсәр, мана орн-нутгин туужин нег һашута халхин тускар шин фильмд үзүлгджәнә.
“МУР” нертә фильмд төрскән харсгч дәәнд кемд Москван уголовн хәәврин көдләчнрин амр биш көдлмшин тускар келгджәнә. Шин фильмин һол дүрнь — Иван Данилов бандитнрла ноолда кеһәд, амр биш үүлдврән сәәнәр күцәдгдән медүлжәнә. Бичкн цагасн авн эн күнд эрдм шүүж авсмн. Фильмд Данилов нег резидентин туск керг илткжәнә. Энүнә хөөн мөшкәч Данилов Ювелирторгин көдләч Ивановскийг алсна туск керг шинжлнә. Эн керг бүрткж илткснә йовудт Бронислав Музыка болн Генрих Гоппен һарджах әәмшгтә бандын керг илткнә. Эмчнрин туск уголовн керг болхла, дарани кинод үзүлгдх зурата.
Олн серийта “МУР” нертә кино Әрәсән нертә бичәч Эдуард Хруцкийн үүдәсн тавн романар — “Комендатский час”, “Тревожный август”, “Приступить к ликвидации”, “Страх”, “Четвертый эшелон” нертә үүдәврмүдәр цокж авгдв. Шин фильм хөрн әнгтә. Тегәд чигн энүг цокж авхд ик цаг кергтә болв, ик көдлмш кинон специалистнр күцәв. Энүг хойр минһн йисдгч жилин декабрь сарас авн нәәмн дундур сардан цокж авгдсмн. Фильм цокж авсн көдләчнрт догшн киитнд болн һан халунд көдлх саам учрв. Шин кинод Әрәсән нертә актермуд Михаил Ефремов, Владимир Гостюхин, Александр Домогаров, Игорь Ливанов, Борис Галкин, Елизевета Боярская, Марина Александрова болн нань чигн артистнр һол дүрмүд нааджана. Михаил Ефремовин келсәр, дәәнә цагт зөв йос харлһна көдләчнр чидлән нөөлго, цуг медрлән олзлж баатр зөмг кевәр көдлдг бәәсмн.
Кино цокж авсн специалистнр Ярославль балһснд Москван дәәнә цагин бәәдл үзүлх кергтә болв. Эн бичкн балһснд ода күртл хуучн туужин гермүд болн уульнцс бәәнә. Энүнә төлә дәәнә кемин Москва балһсна бәәдлин фотозургуд олзлх кергтә болв. Тер бийнь цокж авгдсн обьект болһниг кеерүлх кергтә билә. Магазидын нериг, листовкс — плакатмудыг, дәәнә цагин олн-зүсн зер-зев зурад белдгдв. Келхд, шин фильмин ик чинртә эпизодмуд хуучр Яросавль балһснд цокж авгдла. Үлгүрнь, дәәнә цагт көглржһнә бичкн гер хәәж авх төр босв.
Элст балһсна медәтнрин тоолврар, иим кино баһчудт төрскнч сурһмж өглһнд сән нилчән күргжәнә. Эднә тоолврар, дәәнә цагт мөшкәчнрин күнд үүлдврин тускар келгджәхнь соньн керг болжана.
Дәәнә цагт әмтн яһж бәәснә тускар дәкәд нег үзвидн. Цаарандан хәләх дурн бәәнә.
Ода соньн шин киног телевизорар Әрәсән каналд көдлмшин өдрмүдт асхн хөрн негн часла хәләж болх.
Ээнән Делгр, Бадмаран Владислав
