Әрәсән ачта багш Леонид Санжинов зун насна жилин ончта өөнән темдглжәнә

Эндр Әрәсән ачта багш Леонид Ковальевич Санжинов зун насна жилин ончта өөнән темдглжәнә. Ончта өөнләнь йөрәхәр эндр Леонид Санжиновиг Элстин мэрийн элчнр, арвдгч школын элчнр ирв. Эн школд Леонид Ковальевич кесг жилдән багшлсмн. Мэр Эрдни Шогджиев за заслуги перед городом нертә темдг байрин бәәдлд бәрүлж өгв. Леонид Санжиновин үйнр күнд дәәнә цагт болн орн-нутгиг босхж авлһна төрт орлцсмн, тер бийнь эдн ода күртл чанһ-чиирг болн заглюн гиж гиичнр темдглв.

Ода зун нас наслсн күүнә зәрм сурһульчнр Әрәсәд болн һазадын ордудт сән үзмжтәһәр көдлжәнә.

Дигтә найн жил хооран Ставропольск крайд эсвин багш болж эклж көдлсмн. Нег жил болад, төрскн һазртан Троицк школд көдлв, энд хөөннь директорт шиидгдв. Көдлн бәәж Сталинградск педагогическ институт төгсәв. Школд кесг жилдән көдләд, байн дамшлт хоршав. Ода ачта амрлһнд бәәнә. Зун нас зүүсн көгшәода чигн эрүл-менд, заглюн. Зуг һаза һарад канксн теегин аһар киилх арһ уга гиж Леонид Ковальевич келнә. Иим ик нас зүүсн нуувчин тускар амр цәәлһвр өгнә.

Ростовск областин Потаповск күүтрт тенгин хазгин өрк-бүлд өссмн. Дәәнә цагт дөчн һурвдгч жилин чилгчәр, цуг улан залата хальмгудла хамдан хол киитн Сиврт туугдв. Тенд өрәл сар мод көрәдлһнә күнд көдлмшт көдлжәсн кемд энүг багшин эрдмтә күн гиһәд, Хакасин Сараменск района Орджоникидзевск школд багшлх үрвр энүнд кеж. Гүн медрлтә болн седвәрч эсвин болн физикин багшиг эн района эрдм-сурһулин әнгин инспекторт шиидв. Эрдм-сурһулин халх шүүж авснь бас учрта. Бичкн цагасн авн дегтр умшхдан дурта билә. Түрүн дегтриг энүнд эцкнь белглж. Ода күртл эн белгин тускар Леонид Ковальевич мартхш.

Хөвтә күн бәәжв гиж ода күндтә көгшә келнә. Ода энүг олн элгн-саднь ик баһ уга хәләж кергтә туслмж кежәнә. Күүнәжирһл ик зөөр. Тегәд жирһлин хаалһдан цаһан седклтәһәр бәәж, әмтнд тус күргхлә, ик буйн делгрх гиж Леонид Ковальевич тоолжана.

Ээнән Делгр, Нимгрә Валентина, Ирчин Алексей