Әрүн шүтән Хальмгт ирв
Элст балһсна Казанск кафедральн чонжд эн өдрмүдт Иерусалимск Бурхна Экин хүрн шүтән бәәнә. Энүг хальмг танһчин хотл балһснд Элстин болн хальмгин епископ Зиновий болн Ахтубинск, Енотаевск епископ Антоний евәләр шишлнг кевәр Красный Яр селәнә Христорождественск чонжас Казанск кафедеральн чонжин байрла ирлцүлж авч ирсмн.
Нарта чилгр дулан өдр Казанск кафедарльн чонжд олн хонхин әәд байрин кевәр Иерусалимск Бурхна Экин шүтә олн улс тосж авв. Чонжин өөр әрүн шүтәг Хальмг танһчин православн цуг приходмудын һардачнр, хазгудын элчнр күләв. Танһчин правительствин ахлач Игорь Зотов бас әрүн шүтә тосж авлһна бйрт орлцв. Астраханск областин Ахтубинск балһснас Эслт балһсн күртл әрүн шүтән кесг частан күрв. Элстин болн хальмгин епархин сегләтр протоиерей Алексийн келсәр, Иерусалимск әрүн шүтән олн улст тодлвр кежәнә. Кемр күн болһн төвкнүн цаһан седклтәһәр бәәхлә, энүнә жирһл төвкнүн болх.
Иерусалимск Бурхна Экин әрүн шүтәг Гефсиманьд евангелист Лука арвн тавдгч жилд Иисус Христосиг бурхн болсна хөөн шишлнг иерусалимск христианск ниицәнә төлә үүдәсмн. Тавдчг зун жилд әрүн шүтән Константинополь балһснд билә, энүнә хөөн Новгород, Москва балһсдт тәвгдв. Нег минһн нәәмн зун арвн хойрдгч жилин дәәнә хөөн христианск әрүн шүтәг хулхаһар Парижин Нотр-Дам де Пари чонжд тәвгдж. Ода энүнә олн-зүсн списк Әрәсән православн приходмудт бәәнә. шажнд сүзглдг улсин келсәр, әрүн шүтән илвтә чидлтә гиж тоолгдна. Бурхна Эк һар деерән нилх бәржәснь зургдв. Ахтубинск балһснд әрүн шүтән яһж ирсн тускар гелнгүд туужинь медхш. Тец Александрин келсә әрүн шүтән энд ирснә хөөн олн-зүсн илвтә йовдлмуд учрв.
Ахтубинск болн Енотаевск епархин иерей Александр Корчажниковин келсәр, әрүн шүтәнд саата күүкд үлс ирж мөргнә, үр нуга күүкд улс бас шүтәнд зальврж мөргнә. Эднд шүтән туслна. Гүлгн гемтә улс чигн ирж дөн сурна. Красный Яр селәнд гүлгн гемтә улс дала.
Олн-әмтнә негдлтин байр православн шажнд шүттг улст оюни босхмжин темдг болжана. Хальмг танючин православн шажнд сүзглдг улст хойр дам байр болв.
Элстин болн Хальмгин епархин сегләтр протоиерей Алексий келсәр, Хальмг танһчин һазрт православн шажн делрглт авчах дәкәд нег темдг болжана.
Иерусалимск Бурхна Экин әрүн шүтәнд мөргхәр эн өдр олн улс чонжд ирв. Эдн цугтан ик байртаһар шүтә тосж авв. Гемәсн эдгхәр нааран ирв. Ода седкл төвкнәд, чееж сергмж авв гиж эн күүкд күн келнә. Чонжд хая-хая ирнә. Әрүн шүтәнд мөргснә хөөн чееж сергв, седкл төвкнв гиж эн күүкд күн келнә.
Иерусалимск Бурхан Экин әрүн шүтән Элст балһснд һурвн өдр бәәх. Энүнд олн улс өдр болһн ирәд мөргж чаджана.
Хавтхна Элла Эрнжәнә Эрднь
