Һурвдгч микрорайона арвн һурвдгч тойгта герин әмтн залврин компаня му көдлмшин тускар прокуратурт эрлһ орулж өгв
Элстин һурвдгч микрорайона арвн һурвдгч тойгта герин әмтн залврин компаня му көдлмшин тускар прокуратурт эрлһ орулж өгв. Буревестник нертә негдлтин күргжәх туслмж му гиж эдн бичв. Эн герин ораһар кесг жилдән дусал дусжана, подьездмудт усн орна, дула өгдг системин, усна болн канализацин турвас эвдрәд хуучрв, герин эрсн шуурад, му дүрс һарв.
Татьяна Луневаг эн жилин зунар герин комитетин ахлачд сунһв. Олн давхрта арвн һурвдгч тойгта герт эзн күн ик кезәнәс авн кергтә бәәсмн. Энд капитальн ясвр тас кегдәд уга бәәж. Герин ораһар дусал дусна, турвас зеврәд эвдрв, герин эрсн шуурад, му дүрс һарв. Татьяна Луневан келсәр, Буревестник нертә залврин компань эн жилмүдт ясврин көдлмш кежәхш. Хамгин түрүнд сүл һурвн жилд ямаран ясврин көдлмш кеснә тускар залврин компаняс тооца өгхинь Лунева сурв. Болв компаня залвр кесгтән тооца өгхәр седсн уга, нег үлү энүг мууһар тосв. Онц келхд, көдлмш кесн цаасн уга бәәж, бәәсн цааснд ахлачнр һаран тәвж уга, талдан чигн дуту-дундс илткгдв. Болв хамгин ик дуту-дунднь — тооцаг эдн худлар бичсн бәәж. Эн герт ясврин көдлмш кегдв гиж тооцанд зааж, болв бәәрн улсин келсәр, ямаран чигн көдлмш энд кегдсн уга. Герин эздүд болхла сар болһн компаньд мөнг орулж өгнә. Хойр минһн нәәмдгч жиләс авн эдн залврин компаньд күсдундур сай арслнг өгч. Прокуратурас болн ЖКХ-н министерствас комиссь ирхлә, ясвр кедг көдләчнрин бригад ирв. Герин комитетин ахлач Татьяна Луневан келсәр, усна турвас хаһрхдан өөрхн билә. Үвлин өмн өргнд эннь әәмшгтә. Тер мет герин ораһар дусал дусжана. Мөнгн уга гиһәд, ясвр компань кежәхш. Тегәд арһ уга прокуратурт эрлһ бичх кергтә болв. Зуг энүнә хөөн көдлмш эклв.
Герт ясврин көдлмш кегдсн уга гиж прокуратурин көдләчнр патьрмуд бүрткж хәләсн хөөн келв. Иим ясвр залврин компань кех зөвтә. Хальмг танһчин прокурорин ах нөкд Саглр Манжиковин келсәр, эн герт олн дуту-дундс илткгдв. Зеврсн турвас, хуучрсн герин ора, подьездмудт бас му дүрсн һарч. Буревестник нертә негдлтин һардачин тускар административн керг күцәгджәнә.
Бүртклһнә ашт эн герин төрин тускар прокуратур ЖКХ — министерствин федеральн жилишн-инспекцд эрлһ орулж өгв. Ода инспекцин специалистнр ясврин көдлмш бүрткж хәләх. Залврин компань мууһар ясвр кехлә, эдн административн засгла харһулгдх. Хальмг танһчин ЖКХ-н министерствин федеральн жилишн инспекцин ах специалист Виктор Бабевин келсәр, өгсн үгдән компань күрх зөвтә. Ясврин көдлмш эдн кех зөвтә. Кемр ясврин көдлмш эс кегдхлә, эрлһн мировой зарһд йовулгдх.
Виктор Бабаевин темдглсәр, декабрин арвн йисн күртл залврин компань герин ора, турвас болн эрс ясж шинрүлх зөвтә. Эн көдлмшиг залврин компаня көдләчнр сәәнәр кех гиж герин эздүд нәәлжәнә.
