Һартан урн көвүн цааснас ке-сәәхн кегдлмүд кеж һарһна

Зурһадгч классин сурһульч Андрей Шпилевой көвүн күүнә эрдм биш цааснас кегдлмүд кеж һарһдг көдлмш күцәнә. Энүнә тоолврар, иим үүл седклин сергмж өгч байр үүдәнә. Көвүнә кесн ке-сәәхн кегдлмүд герин хораст кеерүл болж, орж ирсн улсин нүд авлна.

Иргч кегдлин төлә Андрей ширин өнг тохнятаһар ик оньган өгч шүүж авчана. Кегдлмүдән ширдх керг энүнд ик чинр зүүнә. Юнгад гихлә, ямаран ширәр ширдхинь бас сәәнәр йилһж авх кергтә болна. Иим көдлмш кехд һурвн өдр кергтә. Ода эврәннь экдән Мартын нәәмнд белг белджәнә. Эврәннь һарарн кесн белг хамгин сән белг болна гиж көвүн тоолжана.

Цааснас кегдлүмд кедг эрдмәр Андрей нег жил хооран экләд көдлв. Залу улсин эрдм биш гиж эн көвүн үүмжәхш. Хамгин түрүн иим керг соньн гиж тоолжана, тегәд чигн энүнд цуг сул цаган тусхаж көдлнә. Элстин арвн доладгч школын сурһульч Андрей Шпилевой келсәр, хальмг улсин сарин темдгүд цааснас кех саната. Иим эрдм көвүнд йир икәр таасгджана.

Ода ут-тоодан Андрей хөрн көдлмш кеж һарһв. Хамгин түрүн кегдлд Әмд заһсн гисн нер өгв. Энүг ода күртл әрүн кеәвр хадһлжана. Энүг Андрей седлән өгч олн-зүсн өнгтә ширәр ширдж кев. Ода хамгин икәр цецгүдәр болн мал-аһрусар соньмсжана. Иим кевәр Андрей урһмлын болн мал-аһрусна тускар соньн медрл авна. Тегәд чигн Андрей эн төрмүдт нерәдсн олн көдлмш кеж һарһв. Минь одахн Эср мис нертә зург зурад төгсәв. Эврәннь көдлмшән Андрей оньдин багшнртан үзүлнә. Эдн көвүнд чик селвг өгәд, ямаран кегдл кехин тускар уха-серл орулна.

Иргчдән ямаран эрдмәр көдлхин тускар ода Андрей меджәхш. Цааснас кегдлмүд кедг эрдм энүнд кергтә болх гиж көвүн тоолжана. Эннь Андрейин хамгин дурта эрдм болж үлдхнь лавта.

Ээнән Делгр, Котина Валерий