Үлдчнд мини-футбольн марһан болв
Хальмг улсин цаажла харһулсн һашута йовдлд нерәдгдж, Приютненск района Үлдчн селәнд мини-футбольн межрегиональн марһан болв. Энүнд арвн негн команд дииләчән йилһв.
Приютненск района Үлдчн селәнә бәәрн улс гиичнриг тосхдан дурта. Эн жил дөрлдәнд орлцх командсин то өсв. Алтн булг нертә дзюдон болн самбон спортивн клуб болн арвн тавдгч дундун школын Аршан нертә баһчудын клуб марһанд эрк биш орлцхар шиидв. Алт булг клубын тренернь Валерий Есинов.
Арвн тавдгч школын сурһульч Александр Манцаевин келсәр, бүрдәһәчнр марһанд сән белдв кеж. Эдниг йир сәәнәр тосв. Энд таасгджана.
Марһана бүрдәһәчнр түрүләд дөрлдәнд байрин бәәдлд секлһнд цаажин тускар фильм үзүлв. Ставропольск крайин Дивное селәнә бичкдүд хальмг улсин һашута туужин тускар сәәнәр медж авв.
Дивное селәнә школын физкультурин багш Ирина Алексенко келсәр, хальмг улсин зовлнгин тускар медж авв. Хальмг улсла хамдан һундл төржәнә. Иим тууж мартгдшго.
Келхд, давсн жилд марһана кубокиг Дивное селәнә футболистнр шүүж авсн билә. Тиигхд эднлә дөрлддг команд ирсн уга. Эн жил Элст балһсна хойр команд эднлә әдл наадад, зүткәтә дөрлдән болв гиж дөрлдәнә ах зарһч Григорий Нимгиров келнә. Талдан селәдин көвүд бас сән дамшлтан үзүлв.
Үлдчн селәнә келн-улсин гимназин физкультурин багш Григорий Нимгировин келсәр, бичкдүд нааран ирәд дурта наадан наадад, далн жил хооран хальмг улс цаажла харһсн, тенд мөнкинж үлдсн өвкнрин санл тодлв. Иим марһан мана көгшдүдин, эк-эцкнрин болн өөрхн улсин санл тодлжах керг-үүлдвр болжана.
Келн-улсин гимназин директор Зоя Арабгаеван келсәр, турнирин һол күцлнь — хальмг улс хол киитн Сиврт үзсн күзүцә зовлнгин тускар бичкдүдт келж өглһн болжана. Зоя Арабгаева эврән Сиврт төрсмн. Тиихд бичкн күүкн бәәж. Энүнә эк-эцкнрнь даарда-харһнад түрсн зовлнгиг күүкн медхш. Зуг Сиврин һазрт орсн элвг цасн нарн нүднд гилвкдг билә. Олсн ноһан икәр урһдгинь тодлна. Тиигхд сиврин улс болн хальмгуд энүнд ик оньг өгдго билә гиж зоя Арабгаева келнә.
Иван Кравченко Приютное селәнә бәәрн күн. Приютненск районд олн келн-улсин элчнр бәәршлжәнә. Эдн кесг жилдән хоорндан ни-негн бәәнә. Декабрин хөрн нәәмн өдриг Приютненск района толһач эврә һашута йовдл гиж тоолжана. Иим күнд йовдл дорас өсж йовх баһчудт түрү бәәдлд белн болхд туслна.
Приютненск РМО толһач Иван Кравченко келсәр, дән болжасн кемд хальмгуд иим һашута йовдл болх гиж санжасн уга. Санамр бәәсн көгшдүдиг болн күүкд улсин күчәр төрскн һазрас нүүлһв. Тегәд баһчуд саг бәәх зөвтә. Иим йовдл дәкж бичгә үзгтхә. Марһанд Ставрпольск крайин, Элст балһсна болн района арвн хойр команд ирж дөрлдв. Иим турнрин йовудт бичкдүд хоорндан нәәжнр болад, келн-улсин хәрлцән батрна.
Иим марһан зуг дииләчиг йилһж авлһна төлә бүрдәж давулгдсн уга. Энүнд командс иньглтин харһлтс кеһәд, наадд бүлән бәәдлд давулгдв. Аштнь Песчаный поселкин футболистнр кубок шүүж авв. Хойрдгч орм Алтн булг нертә дзюдон болн самбон спортивн клуб эзлв. Һурвдчг ормд Үлдчн селәнә футболистнр һарв.
Батан Санжирма, Хулхачин Николай
