Зурач Эдуард Азыдовин үүдәврмүдин һәәхүл секгдв

Пальмовин нертә келн-улсин музейд Эдуард Азыдовин үүдәврмүд һәәхүл секгдв. Танһчин зурачнр болн экспозиц хәләхәр ирсн әмтн Эдуард Азыдовин үүдәлтиг өөдәнәр үнлж, хәләһәчнриг күндлж тевчдг зурач гиж энүг нерәднә.

Эн һольшг зангта күн өвәрц үүдәврмүд зурна. Үүдәвр болһниг ик эртәснь дотран ухалж авна, зург болһниг седклән өгч зурна. Искусствин үүлдәч болһнд эврән хаалһан, эврә янзан олж авх кергтә. Зәрмдән энүг олж авхин төлә кесг жил кергтә болна. Иим үүлдәчнрин тоод Эдурад Азыдов оржана. Энүнә үүдәврмүд нурһлж көк болн ноһан өнгәр зургдна. Иим өнг зурачд өөрхн болсн деерән, энүнә уха-сана медүлжәх өнг болжана.

Пальмовин нертә келн-улсин музейин директорин дарук Ирина Новомлинован келсәр, Эдурад Борисович Азыдов дүрслчг искусстврин цуг янзар көдлнә. Зуурач натюрморт, йиртмж болн туужин зургуд зурхдан дурта. Мана һәәхүлд цуг янзта көдлмш үзж болх. Эдурад Борисович эврәннь үүдәврмүдтән соньн шир олзлна. Йовж йовсн кү эс гиж мал-аһрус йир сәәнәр зурж чадна.

Билгтә зурач Эдурад Азыдов эврәннь энкр школдан арвн тавн жилдән көдлжәнә. Энүнә сурһульчнрин зәрмнь багшан дураһад зург зурлһна эрдмин хаалһар йовх саната. Тер мет негдгч классин сурһульчнрин хальмг келнә учебникин зокьялчин негнь болжана. Антонина Коокуеван келсәр, зурачин үүдәврмүдиг нәәжнртән болн өөрхн улстан белглнәвидн. Энүнә зургуд цуг Әрәсәд болн һазадын ордудт тархагдв.

“Нүүлһн”, “Хаврин тег”, “Үдин кем”, “Натюрморт” болн талдан чигн Эдуард Азыдовин зургуд өвәрц янзарн болн чинрәрн йилһрнә. Зурач Эдуард Азыдовин келсәр, Багшин күцлнь — баһчудт чик сурһмж өглһн, зурачин күцл болхла әмтнд ке-сәәхниг үзүлх төр болжана.

Зурач Азыдовин келсәр, искусствин үүлдәч дор ормдан зогсх зөв уга. Оньдин уралан девшәд, шин үүдәврмүд үүдәх зөвтә. Эннь зурачин жирһлин товч үг болжана.

Хавтхна Элла, Хулхачин Николай