ЖКХ-н халхар бүртклһн кегдв
Финансин-бюджетн церглт болн прокуратур долан залврин компань бүрткж шинжлв. Бүртклһнә ашт мөнгнә халхар олн дуту-дундс илткгдв. Энүнә туск материалмудыг танһчин прокуратурт орулж өгв. Танһчин правительствин ахлач Игорь Зотовин һардврт болсн сүүрт энүнә тускар келгдв.
Залврин компаньсин ору бүклдән әмтнә коммунальн туслмжас тогтна, тер мет олн давхрта гермүд яслһна, әмтн бәәдго хорас нәәмәдлһнә болн улст туслмж күрглһнә мөнгн бас компаньд орж иржәнә. Авсн мөнгиг талдан халхар олзлсна йовдлмуд долан залвринг компань бүрткж хәләснә йовудт илткгдв.
Хальмг танһчин финансин бүртклһнә церглтин һардач Петр Бакиновин келсәр, коммунальн туслмжин әмтнә өгсн йирн тавн сай арслнг залврин компаньс бүклдән оурлж өгч уга. Ут-тоодан хөрн сай арслнг мөнгн талдан халхар олзлгдж.
Тер мет залврин компаньсин оруһин болн һаруһин халхар талдан чигн зака эвдсн йовдлмуд илткгдв. Хөрн нәәмн сай арслнг мөнгн талдан халхар олзлгдж гиж бүртклһнә ашт медгдв. Ода энүнә туск цуг материалмуд прокуратурт йовулгдв.
Прокуратурин көдләчин келсәр, финансин бюджетн бүтрклһнә церглтәс «Центральный”, “Жанһр”, “Престиж” болн “Квартал” нертә залврин компаньсин туск документ ирв. Ода эн халхар бүртклһн кегджәнә.
Хальмг танһчин жилишн-коммунальн эдл-ахун болн энергетикин министр Нелли Ткачева тогтсн бәәдлиг яһж чиклхин тускар келв. Министр Ткачеван келсәр, илткж авсн цуг материалыг гермүдин комитетмудт йовулх кергтә. Олн давхрта гермдүт бәәх әмтн эврәннь залврин компаня көдлмшин тускар медх зөвтә.
Бүртклһнә ашт мөнг хажһр олзлжах компаньсиг йилһж авв. Тегәд ода бәәрн әмтн ямаран залврин компаньс мууһар көдлжәхин тускар меджәнә гиж правительствин ахлач темдглв.
Хальмгин правительствин ахлач Игорь Зотовин келсәр, иим көдлмшин һол күцлнь — эн халхар бәәдл ясрулһн болжана. Әмтнә өгсн мөнгн туслмж күрдг организацд күрх зөвтә. Эн халхар бәәдл чиклх кергтә. Залврин компаньс эврәннь көдлмшән сәәнәр күцәх зөвтә.
Тегәд өдгә цагт залврин компаньсин көдлмшиг бүрткх арһ учрв. Эн туст бәәрн улсин седвәр кергтә. Коммунальн туслмжин мөнг үлүһәр өгхин ормд, залврин компаньла учрсн зүткәтә төрмүдиг хаһлх кергтә болжана.
Елена Алексенко, Настан Сергей
