Жалван конвертд авчах улс пенсь уга үлдх әәмшгтә
Хальмг танһчд жалвиг конвертд өгдг йовдлмудла ноолда кех кергтә. Энүнә тускар премьер-министр Игорь Зотов келсн билә. Жалвиг конвертд өгхәлә, көдләчнр һарута болна, танһчин бюджетд алвна мөнгн баһар орж ирнә.
Эндр жалван конвертд авхла, иргчдән көгшрхлә пенсь уга үлдх әәмшг бәәнә гиж Пенсионн сангин балһсна заллтин көдләчнр келнә. Иим кевәр предприятьмудын һардачнр алван нууһад өгчәхш. Иим кевәр бичкн тосхлтын фирмс, обшепитын предприятьмуд болн һаза хулд кедг улс шанг мекләд, алв өгхәр седжәхш. Документар предприятин тоод көдләчнрин хамгин бичкн то заагдна, эдн йосн цаасар бичкн жалв авчана. Үлдсн мөнгиг цаасн угаһар конвертд авчана. Өдгә цагт көдләчнриг ик жалв үүмүлжәнә, ямаран кевәр энүг өгчәхнь эдниг соньмсулжахш. Элст балһсна улсин тоолврар, көдлмш уга цагт көдләчнрин ик зунь жалвиг йосн бишәр авчана. Иргчдән эдн бичкн пенсь авхин тускар эдн ода деерән санжахш. Ода государственн предприятьд көдлжәнә. Насни туршт шангд иткжәнә. Коммерческ организацд иткжәхш. Пенсь авх кергт. Пенсьд орулж өгчәх даатхлһна мөнгн бикн болжана. Күн пенсьт һархла, авдг мөнгн уга болх. Предприятин һардачнр күч-көлснә жалвиг цугинь өгх зөвтә.
Үлгүрнь, нер-усан эс заасн күүкн жалвин ик зууһинь йосн бишәр ачаснас көлтә, сүл көдлсн сарин жалв уга үлдн гив. Элст балһсна эзнә нег компаньд менеджер болж көдлжәсмн. пенсиоон сангин көдләчнрин келсәр, жавлиг конвертд өгчәхин тускар зәнг өгсн улсин то жил ирвәс өсәд йовна. Эннь хажһр болн әәмшгтә йовдл болжана. Пенсионн сангд ирсн улс жалван йосн кеәвр эс авчхин тускар келж өгәд, иим бәәдл ямаран ашта болх гиж соньмсжана. Иим улст пенсь өгх, зуг энүнә кемжәнь хамгин бичкн болх. Иим кемжән йосн жалвас ирсн даатхлһан мөнгнә кемжәнәс тоолж һарһгдна.
Пенсионн сангин заллтин әнгин ахлачин дарук Валерий Манджиевин келсәр, зәрм предпритяьмуд авл өгх мөнгнә кемжәг нуужана. Тер мет жавлин алвна, социальн даатхлһна болн Пенсионн сангд орулж өгдг мөнгн нуугджана. Эдн цуһар хоорндан залһлдата. Юнгад гихлә, көдләчнрин жавлас мөнгн иржәнә.
Кемр көдләч жалван конвертд авхла, күч-көлснә пенсь уга үлдх әәмшг бәәнә. Эн зөв күцәлһн предприятьмудын-организацсин һардачнрин социальн дааврла өөрхн залһлдата. Жавлиг конвертд өгдг хажһр йовдлмудла ноолда кехин тускар танһчин правительствин ахлач Игорь Зотов дуудвр кесн билә. Иим таалд хамгин түрүнд танһчин бюджет алвна мөнгн баһар орж иржәнә.
Ээнән Ольга, Очра Сергей
