Яшкульск районд һахуляр заһс бәрлһнә танһчин марһан болв
Зәрм улст заһс бәрлһн йоста эрдм болна, талдан улст сул цаган сергмжтәһәр давулдг кем болна. Зәрм әмтн иим кергиг чеежин сергмж авхин төлә күцәнә гиж келгднә. Яшкульск районд заһс һахуляр бәрлһнә танһчин чемпионат болв. Дөрлдән Ижл-Чоһран усна цувгд болв. Энүнд хөрн заһсч дииләчән йилһв.
Эн өдр аһарин кемжән зурһан градусас дуларсн уга. Киитн салькта, хурта өдр болв чигн хөрн заһсчнр Ижл-Чоһран цвгд ирәд, дөрлдәнд орлцв. Эн цувг Яшкульск района аһуһар давж һарна. Эн саамд спортсменмүд заһс һахуляр бәрв. Хойр минһн доладгч жилин чемпион Сергей Кравцов нурһлж спиннингар заһс бәрнә. Иим эв-арһар сазн болн цурх бәрхд сән гиж эн келнә. Эндр болхла Сергей һахуляр заһс бәржәнә. Улан боллго түрүн заһс бәрж авв. Сергей Кравцовин келсәр, эн заһсн хойр зун грамм татх. Би болхла икәр заһс бәржәхшв, зуг спорт гиһәд, марһанд орлцнав гиж эн келнә.
Олн жилдән заһс бәржәх Виктор Алексеевич Кондратенко Хальмг танһчд заһсн альд сәәнәр бәрж болхин тускар сәәнәр меднә. Жирн тавн наста болв чигн, заһс бәрдг эрдм энүнд ик дөн болна. Иим керг күцәһәд, чанһ-чиирг, цогц — махмуд бат болна гиж эн келнә. Долан хонг болһн Кондратенко танһчин усна боодугт болн һолмудт одад, дурта эрдмдән сул цаган тусхана.
Эн көвүн болхла марһана хамгин бичкн орлцач. Доладчг классин сурһульВолодя Чистяковд заһс бәрдг эрдм аавнь дасхж. Марһанд орлцхин төлә шишлнг һахуль хулдж авч.
Володя Чистяковин келсәр, заһсн дала болхла өтәр бәрж авхд сән. Хойр минут болад заһсн торна гиж Володя нуувчарн хувалцв. Марһан орлцачнрт тенгрин бәәдл үлмәһән күргв гиж келх кергтә. Тегәд чигн нурһлж бичкн, үүрмг заһсн бәргдв. Тер бийнь заһсчнр дегд икәр һундсн уга. Кеер цевр аһар кииләд, некмг-шунлтта керг күцәхлә, чеежин сергжм авна.
Виктор Дорджиевин келсәр, Заһсчнрин нуувч иим. Хамгин түрүн теслт кергтә. Заһс бәрдг күн болһн дотарн ик нәәлвртә ирнә. Хамгин ик заһс бәрж авч чадхв гиж санна. Болв иим ик заһсн оньдин алдрад йовж одна.
Марһан орлцачнр дөрвн частан заһс бәрв. Аштнь эдн олн-зүсн заһс бәрж чадв. Жюрин шиидврәр һурвн килограмм заһс бәрж авсн Сергей Кравцов диилвр бәрв, хойрдгч ормд Сергей Манджиев һарв, һурвдгч орм Альберт Закиров эзлв. Хальмг танһчин заһс бәрлһнә спортын ниицәнә ахлач Эрднь Цатхаевин келсәр, спортсменмүд ода санамардх зөв уга. Удл уга талдан ик чинртә марһан хальмг танһчд болх. Спиннингар заһс бәрлһнә дөрлдән ноябрин зурһанд болх.
Арстана Светлана Колдан Церн
