Ветеранмуд дунд волейбольн болн мини-футбольн нәәмдгч марһан болв
Элст балһснд хальмг улсиг цаажла харһулсн өдрт нерәдгдсн ветеранмуд дунд волейбольн болн мини-футбольн нәәмдгч марһан болв. Энүнд арвн хойр команд дииләчән йилһв. Дөрлдәнә дииләчнр болн призермуд дипломсар болн кубокар ачлгдв.
Баатр Патаев иим волейбольн болн мини-футбольн марһанд жил болһн гилтә марһанд ирж орлцна. Алтайск крайд төрсн болад, эн крайин командын ханьд наадна. Баатр Очировичин келсәр, эндрк дөрлдән киитн Сиврт өнгрсн улсин санлд нерәдгджәнә.
Давсн жилд Алтайск крайин команд түрүн орм эзлсн билә. Эн жил командын волейболистнр болн футболистнр бас эрк биш диилвр бәрх саната. Эднә тодлсар, бичкн цагтан Сиврт футбол нааддг билә, бәәрн көвүдлә хоккей наадх саам учрдг бәәсмн. Тер цагт төрскн һазрасн бичкдүд ода эцк-аав болв. Эдн бас хальмг улсин үзсн зовлнг бөдүн улсла хамдан дааһад һарв.
Омск болн Новосибирск областьмудт болн Красноярск, Алтайск краймудт төрсн бичкдүд ода эврәннь команд тогтав. Ут-тоодан дөрлдәнд зун күн орлцв. Спортын комплексин директор Баатр Боваевин келсәр, жил ирвәс дөрлдәнә орлцачнрин то өсәд йовна. Спортын комплексин директор Баатр Боваевин келсәр, иргч жилд танһчин цуг райодыг марһанд дуудх зура бәәнә. Энүнд хойр зун күн орлцх зөвтә. Иим дөрлдәнә һол күцлнь — цаажла харһсн улсин санл тодлһн болжана, хойрдвар, дорас өсж йовх бачһуд иим марһа хәләһәд, сән үлгүр авх ицл бәәнә.
Марһаг спортын ветеранмудын үрдүд болн ачнр-зеенр бәәнә. Эднә келсәр. эврәннь аав-эцкдән дурта. Эднә жирлһин хаалһ баһчудт сән үлгүр болжана.
Ээнән Делгр, Хулхачин Николай
