Ветеран Бикбулатов видеoзургт бийән таньв

“Вести-Калмыкия” программин “Бийән тань” нертә рубрикд үзүлсн зургт бийән эс гиж өөрхн улсан таньсн улс мана редакцур жиннүлжәнә. Эн саамд Элст балһсна бәәрн күн Хасан Бикбулатов видеозургт бийән таньж.

Эн зургудыг һучн нәәмн жил хооран цокж авч. Тиигхд баһ наста жолач Хасан Бикбулатов Элст-Волгоград хоонрндк хаалһ тосхжасмн. Кесг жил болад бийән болн хамдан көдлжәсн улсиг телевизорар үзхв гиж санжасн уга. Маднла күүндсн цагт маши залач тер өдрин тускар цугинь тодлж келж өгв. Хасан Бикбулатовин тодлсар, асфальт зөөжәсн бәәж. Машинас аца буулһхинь күләв. Дарунь талдан улс дууда, күүндвр кев. Тер цагт дегд баһ наста бәәж. Бригадын ханьд арвн машин ордг билә. Шин хаалһ эдлврт орулсна байрт орлцж.

Хаалһин тосхлтын тускар мана программд архивн зургуд үзүлснә хөөн, энүг хамдан көдлжәсн улс зургт таняд жиннүлсн бәәж. Тиигхд Бикбулатов аца зөөдг машинд көдлжәлә. Хөөннь олн-зүсн инженерн-техническ цолдж көдлх саам учрв. Нег минһн йисн зун найн зурһадгч жиләс авн негдгч тойгта Элст балһсна автокөлгн-күчнә предприятин директор болж көдлв. Энүнә һардврт аца зөөлһнд бригадн подряд орулгдв. автомобильмүд яслһна заллтин цутхлнг секгдв. Жолачнрин төлә хойр патьрта зурһан гер тосхгдв, обшежить бәргдв, производсвенн хорас секгдв, машина тосн-түләнә станц шинрүлгдв.

Хасан Бикбулатовин келсәр, иим зургуд дегд соньн болна. Хальмг танһчин босхмжд баһ дүүвр насндан көдлсн улст иим килмж күргхлә, сән керг гиж тоолжана. Иим зург бәәхинь медсн уга. Цуг арһ-чидлән агсж көдлсмн әмтиг үзәд, зургт цокж авснь сән йовдл болжана.

Ода Хасан Бикбулатов ачта амрлһнд бәәнә. Бийән тань нертә рубрикд тер цага зург үзүлснь немр чидл урмд өгәд, давсн жилмүдин туск тодлврмуд сергәв. Энүнә аваль Фаиля Муллаевнан келсәр, иим зург ик байр үүдәв, цуг өөрхнь улс байрлад, жиннүлв. Ода Бикбулатовихн хойр көвүһән кү кеһәәд, долан ачнран энкрүлж өскжәнә. Эврәннь ааван баһ цагтнь үзхлә өвәрц болв гиж эдн келнә.

Фаиля Бикбулатован келсәр, иим зург үзхлә чееж сергнә. Баһ дүүвр насан тодлад, хоорндан күүндәд сүүввидн. Хасан цергәс бууж ирсн цаг сананд орв. Дарунь авальнь нааран ирж. Өрк-бүлән тогтав.

Ода Бикбулатовихна герт цокж авсн шин видеозургудыг олн жил давхла эднә жижчнр хәләх гиж Хасан болн Фаиля шоглж келнә.

Ээнән Делгр, Хулхачин Николай