Урн һарта эрдмч эврәннь нуувчарн хувалцв
Эн күүкд күн урн һарта. Энүнә тускар өөрхн улснь, нәәжнрнь келнә, олн-зүсн күндлһнә һашгуд ил герч болжана. Белла Бевинова кевс неклһнә нарта-делкән марһасин дииләчин болн призерин нер зүүсмн. Эврәннь көдлмшән үзүләд, цуг Европиг эргәд ирв. Ода урн һарта күүкд күн дорас өсж баһчудт һарин эрдм дасхжана.
Кевст нексн ке-сәәхн хурл энүг хәләсн улсин зүрк авлна. Өвәрц кевс хәләсн әмтн хурлын дотр орснла әдл болж медгднә. Иим илвтә чидләр кевс олн улсин седкл байрлулна. Эннь бас учрта. Юнгад гихлә энүг үүдәсн урн һарта күүкд күн цуг седклән тусхаж кенә. Белла Бевинован үүдәлтд келн-улсин төр һол оньг эзлжәнә. Эврәннь келн-улсин сойлыг хадһлад, делгрүлж күүкдтән медүлх күцл тәвжнәв гиж күүкд күн келнә.
Белла Бевинован келсәр, мана өвкнрин бәрж йовсн эрдмиг босхж авх кергтә. Арвн һурвн жилдән Сиврт геесн эрдмиг сергәх кергтә. Бичкн күүкн өсәд, эк болх. Урн һарта күүкд күн ке-сәәхн кегдлмүд үүдәһәд, эврәннь герән кеерүлж чадх.
Теегин ке-сәәхн бамб цецг, тоһрун шовун. Цуг эн тоот Белла Дорджиевна өрк-бүлин болн билгтә күүкд күүнә әрүн темдг болжана. Хол киитн Сиврт төрәд, эврәннь өрк-бүлтәһән күүнә һазрт күзүцә зовлнг дааһад төрскн һазртан ирв. Тегәд чигн Белла Дорджиевна бат зангта, чанһ-чиирг болн өрк-бүлиннь зангшал әрүнәр хадһлдг күн болж өсв. Тууврт бәәсн цагт эврәннь экәсн болн ээжәсн хувц уйцдг болг өлгдг түрүн эрдм дасж авла.
Белла Бевинован келсәр, урн һарин эрдм энүнд бичкн цагасн авн бәәж кевтә. хальмгудыг Сиврт нүүлһсн кемд, тенд экнь болн ээжнь урн һарин эрдмәр көдлдг бәәсмн.
Болв насни туршарт көдләд, дурта эрдмәрн көдлдг цаг уга болад бәәв. Зуг ачта амрлһн һарсн хөөн, йоста кеәвр урн һарин эрдмәр көдлдг болв. Талдан орн-нутгудт одх дурн билә. Зуг дурта эрдмин нилчәр иим олн һазрт одх гиж санжасн угав гиж эн келнә. Венеция, Барселона, Милан, Канны, Париж. Белла Бевинова цуг Европиг эргәд ирв. Олн-зүсн һәәхүлмүдт, фестивальмудт орлцв. Кесг дәкж дииләч болн лауреатын нер зүүв. Ода урн һарта күүкд күн дорас өсж йовх баһчудт дурта эрдмән дасхжана.
Наталья Лиджиеван келсәр, Белла Дорджиевнад ик ханлтан өргжәнә. Энүнә күүкдт урн һарин эрдм дасхад, эдниг соньмсулв. Белла Дордживна бас ик теслттә күн. Бичкдүдт урн һарин эрдм дасхд бас мр биш болна.
Белла Бевинова олн-зүсн халхар билгтә күн. Найн йисдгч жилд ке-сәәхн күүкд күн Инесса Селезневан цокж авсн Анна Петровна фильмд наадв. Эн кинод һол дүриг нертә артистк Лариса Гузеева наадсн билә.
Химин болн биологин багш, библиотекарь, района зургудын галереин һардач болж көдлв. Көдлсн һазртан оньдин седклән өгч чидлән нөөлго көдлдг бәәсмн. Ода сойлын ачта көдләч, күч-көлснә ветеран, танһчин цергә комиссариатын медлд үүлджәх эк-эцкнрин комитетин ахлач болжана. Тер мет хальмгин күүкд улсин ниицәнә парвляна гешүн.
Белла Бевинован келсәр, оньдин көндрәд көдлмш кенә. Хойр — һурвн өдр юм эс кехлә му болна. Кевтхлә бас му болна, кевтхмн биш. Оньдин көндрәд көдлмш кехлә сән болна.
Эврәннь ончта өөнд эврәннь эк-эцкдән нерәдгдсн дегтр һарһх зурата. Эк-эцкнь энүг өскәд босхад, чик сурһмж өгв. Энүнә жирлһин хаалһд хамгин үнтә зөөрнь өрк-бүл болжана. Өөрхн улсин дөн угаһар иим күцәмж бәрж чадшго биләв гиж Белла Бевинова келнә.
Елена Алексенко, Хавтхна Анатолий
