Урн һарта бичкдүдин фестивальд мана танһчин элч ончрв

«Әрәсән билгтә бичкдүд» нертә цугәрәсән фестиваль Москва балһснд болв. Энүнд мана орн-нутгин кесг регионмудын хойр миңһ һар көвүд-күүкд орлцв. Арвн негн наста Иляна Андреева мана таңһчин нериг харсад, Гран-при шүүж авч чадв.

“Хальмгин хатн” болн “Бадм цецг”. Иим нертә бүшмүд Иляна Андреева эврән ухалад, марһанд уйж. Энүнә төлә урн һарта күүкн медицинск сернжл болн нег дәкж олзлдг халатмуд олзлж. Эдниг акрилин ширәр будв. Энүнә кесн бүшмүд марһана урн һарин үүдәлтин номинацд гран-при шүүж авв. Алинан уйсн костюм Москва балһснд үлдв. Уйн наста эрдмч маднд бүшмүдиг зургуд үзүлв. Иляна келсәр, эдниг уйхин төлә хойр сар кергтә болв. Иим көдлмш нәрн болн жанһрта. Иляна Андрееван келсәр, иим хойр костюм уйх санан школд кичәлд суухла орв. Багшин келг үг сонслго, эврәннь тускар ухалжасн бәәж. Генткн иим хувц уйх санан орв. Цаас авад, зургинь зурв. Гертән ирәд цуг тооца кеснә хөөн, экләд бүшмүдән уйж.

Хувц уйдг эрдмәр күүкн дөрвн наснас авн соньмсдг болв. Иим һарин эрдмиг ээжәсн дасж авла. Ээжнь ач күүкндән оньдин ке-сәәхн хувц уйдг бәәж. Ода Иляна эврән хувцна сәәхн кев-янз үүдәнә.

Ода Иляна хувциг хуучн эдәс эс гиж талдан материалмудас кеж һарһна. Одахн экологическ хэнд-мейд номинацд Мода своими руками нертә шишлнг мөрәһәр ачлгдв. Шар өнгтә бүшмүдиг полиэтилена пакетмудас кеж. “Ноһан Дәрк” нертә костюм энүнә хамгин дурта кегдл болжана. Энүг хойрдгч класст сурчаһад уйж. Ода билгтә сурһульч эврәннь түрүн “Россия” нертә көдлмшән бас әүрн кеәвр хадһлжана. Иляна Андрееван келсәр, эврәннь өмсжәсн дурта кепкас соньн хувц үүдәв.

Урн һарта сурһульч танһчин, цугәрәсән болн нарта-делкән олн-зүсн марһаст диилвр бәрв. Художественн школын багш Делгр Сангаджиеван келсәр, Иляна күцлдән күрдг күүкн болж өсжәнә, шин медрл авхар зүткнә. Багшин тоолврар, Иляна билгиг эрк биш делгрүлх кергтә. Иим фестивальмуд үүдәгч эрдмиг илткж авлһнд туслна, өмнән тәвн күцлд күрхд сән нилчән күргжәнә.

Рокчинскийн нертә художественн школын багш Делгр Сангаджиеван келсәр, Иляна школд дурлж сурчана. Гертән дала көдлмш күцәнә. Үүдәгч күн болад, сән үзмж бәрнә, олн-зүсн марһаст орлцна. Олн халхар эрдмән делгрүлхәр зүткнә.

Оджа Иляна Сочи балһснд апрелин чилгчәр болх фестивальд белдвр кежәнә. Кех күцәх санан дала гиж эн келнә. Болв ода деерән эннь нуувч болжана.

Ээнән Делгр, Настан Сергей