“Тюльпанчик” ансамблин бичкн билгтнр Париж балһсна улсиг өврүлв
Июнь сарин чилгчд бичкдүдин ансамбль «Тюльпанчик» Францин орн-нутгас ирв. Талын һазрт көвүд-күүкд «Парижские звезды» нертә фестивалин гран-при шүүж авв. Эн өдрмүдт бичкдүд амрлһндан бәәсн бийнь, иргч концертд белдвр кежәнә. Ансамблин орлцачнрта мана үүдәгч баг харһв.
Ода сурһульчнрин амрлһна кем гүргүдән. Болв “Тюльпанчик” ансамблин бичкдүд гертән хара суужахш. Сул цаг бәәхлә, эдн эврәннь энкр коллективдан одхар адһна. Көвүд-күүкдиг энд Людмила Толкачева байрлж тосна. Эдн бүл сардан харһад уга. Тегәд чигн олн сурврмуд нег-негндән өгәд, бүлән күр-күүндвр кенә. Париж балһснд болсн фестиваль бичкн артистнрт кесгтән мартгдшго йовдл болв.
Эн саамд Хальмгин бичкдүд Францин хотл балдснд одсна тускар ода күртл бахмжтаһар келнә. Тенд көвүд-күүд Диснейленд хәләв, балвсас кесн көшән музей һәәхв, Эйфелева цамхгд давшв. Болв Хальмгин артистнр фестивалин ашар йир сән үзмж бәрснь хамгин байрта зәнг болв. Маша Тусупован келсәр, Францин әмтн эдниг иим бүләнәр тосхин тускар санжасн уга бәәж. Мария Тусупован келсәр, иим кевәр альх ташх гиж күләжәсн уга. Түрүн авгтан юн болжахнь медж чадсн уга бәәж.
Фестивальд орлцсн талдан коллективмудын билг-эрдм икәр таасгдв гиж Элвг Габуншин келнә. Әрәсән, Францин келн-улсин ансамбльмуд, Карибск бассейна орн-нутгудын болн америкин Майями балһсна бииһин багмуд Париж балһснд ирв. Элвг Габуншина келсәр, иим ик чинртә фестивальд орцлснь ик бахмж болв. Талдан һазрин көвүд-күүкдин билг-эрдм хәләхд соньн болв. Тедн йир сәәнәр биилнә.
Ансамблин һардач Людмила Толкачеван келсәр, эн жил бичкдүдин коллектив сән үзмж бәржәнә. Москва балһс харслһна дәәлдәнә далн жилин өөнд нерәдгдсн фестивальд гран-при мөрә шүүж авла. Эннь йир сән эклц болв. Ода Хальмгин Тюльпанчик ансамблиг мана орн-нутгин болн һазадын ордудын олн әмтн ик гидгәр күләж, эднә концертиг ик оньган өгч болн дурлж хәләнә. Тер мет бичкн артистнр олн-зүсн буйнч седклин концертмудт бас орлцна. Париж балһснд шүүж авсн гран-при мөрә цуг нарта-делкәд хальмг улсин сойлар кесг әмтн соньсмжах ил герч болжана. “Тюльпанчик” ансамблин һардач Людмила Толкачеван келсәр, иим ик чинртә мөрә шүүж авснь — хальмгин сойл өөдәнәр үнлжәх темдг болжана.
Удл уга ансамблин орлцачнриг талдан байрта йовдл күләжәнә. Эн намрар бичкдүдин коллектив эврәннь хөрн жилин өөнд белдвр экләд кех. Эднә ончта өөн иргч жилд темдглгдхмн.
Татьяна Дмитриева, Ирчин Алексей
