“Тюльпанчик” ансамбль хөрн жилин өөнән темдглв

“Тюльпанчик” нертә бичкдүдин ансамблин хөрн жилин өөнд нерәдгдсн концерт Элст балһснд болв. Уйн наста артистнр государственн концерн билг-эрдмән үзүлв. Бичкн билгтнр хамгин сән гисн бииһән үзүлв. Бичкдүдин коллектив кесг дәкж цугәрәсән болн һазадын ордудын марһаст диилвр бәрәд, хальмг улсин сойлыг ик холд туурулв. Тер мет эн өдр ансамблин һардач Людмила Толкачева жирн жилин өөнән темдглжәнә.

Государственн концертн залд дала әмтн цуглрв. Бичкн артистнрин билг-эрдмиг хәләһәчнр бүләнәр тосж, сцен деерәс эдниг тәвлго, удан альхан ташв. Иим бүлән кевәр «Тюльпанчик» ансамблиг олн әмтн талдан чигн һазрт тосна. Эн жил ансамбль хөрн жилин өөнән темдглжәнә.

Байрин концерт һардсн улс бичкдүдин коллективин һардачнр Людмила болн Геннадий Толкачевихниг сцен деер һархинь дуудж авв. Хәләһәчнр эднд бүлән үгмүдән нерәдв, цецгүд бәрлж өгв. Онц келхд, эн өдр Людмила Геннадьевна төрсн өдрән темдглв. Нег үлү, энүнә ончта өөн бас темдглгджәнә. Ансамблиг болн энүнә һардачнриг хальмг танһчин толһач Алексей Орлов халунар йөрәв.

Танһчин толһач Алексей Орловин келсәр, таднд ик ханлт өргжәнәв. Тана күцәжәх көдлмш ик чинр зүүжәнә. Дурта эрдмәрн тадн олн жилдән көдләд, маднд ик баүр үүдәжәнәт. «Тюльпанчик» ансамбльд компьютер белглжәнә. Энүнә дөнгәр гүн медрл автн гиж йөрәжәнә.

Байрин концерт болхин өмн кулисин ард бас шуугата болв. Людмила Геннадьевна гримерн хорад орж ирхлә, бичкдүд энүг шуугатаһар йөрәв.

«Тюльпанчик» ансамбльд долан үйнр сольгдв. Хальмг танһчин бичкн артистнр Париж, Рим, Багдад балһсдт одад, билг-эрдмән үзүлсн билә. Уйн наста артистнр хальмг улсин өвәрц сойлыг ик холл һазрт туурулв. Ансамблин художествен һардач Людмила Толкачеван келсәр, иргчдән бичкн артистнр дала һазр эргәд йовх гиж нәәлжәнә.

Давсн жил бичкдүдин коллективд бас ончта болв. Владимир Спиваковин үрврәр, Тюльпанчик ансамбль «Москва встречает друзей» нертә нарта-делкән программд орцлад, гала-концерт секх күндтә зөв авсн билә. Тер мет эдн Францин орн-нутгт болсн фестивальд бас сән үзмж бәрв. «Парижские звезды» нертә фестивалин гран-при хальмгин бичкн артистнр шүүж авла. Иим сән үзмж бәрхин төлә ик белдврин көдлмш кех кергтә болжана. Эн күүкнә келсәр, «Тюльпанчик» ансамблин ханьд Париж балһснд одв. Эйфелин цамхаг үзж, Луврт одла, Диснейленд балһснд одад наадв. Мартгдшго йовдл болв. Бичкн артистын темдглсәр, би биллхдән йир дурта. Эн өдриг ик удандан мартшго. Йоста ик ончта өөн болжана.

Людмила Толкачеван келсәр, цаг яһж гүүснь медгдхш. Дурта көдлмшән кехлә, цаг яһж өнгрснь медгдсн уга. Ода энүнә түрүн сурһульчнрнь деед сурһулян төгсәһәд, “Тюльпанчик” ансамбльд ирж көдлжәнә. Тегәд бичкдүдин коллективин иргч бәәхтә болх гисн бат иткл бәәнә.

Ансамблин художествен һардач Людмила Толкачеван келсәр, бичкдүд би биилхләрн икәр байрлна. Бииһин сән эрдм авсе деерән, бичкдүд цаһан седклтә өршәнһү улс болж өснә.

Чучян Валентина, Ирчин Алексей