Теегин һәрд шовун Әрәсәд уга болж одх әәмшг бәәнә
Эндр эдл-ахун министерствд теегин һәрд харслһна туск сүүр болхмн. Мана үүдәгч баг специалист —арнитологла харһад, эн шовуна тускар күүндв.
Орнитологудын то-дигәр, Улан Дегтрт орулгдсн теегин һәрд шовуна то йирдгч жилин эклцәс авн зөвәр баһрв. Хөрн жил хооран иим шовуна то тәвн минһн күрдг бәәсн болхла, ода эднә то әрә гиж дөрвн минһнд күрчәнә. Иим кевәр һәрдин то баһрхла, арвн жил болад, теегин һәрд тас уга болж одх әәмшг бәәнә. Хальмг танһчд региональн организацсла көдлмш кедг төсвин зүүцүлгч Руслан Меджидовин келсәр, ода теегин һәрдин то баһржахнь бас учрта, юнгад гихлә эднд иддг хот уга болжана. Иим һазр хадһлхин төлә хамгин түрүнд зурмн бәәдг һазриг хаһлх керг уга.
Ода теегин һәрд шовун экосистемин нег ик чинртә әнгнь болжана. Иим шовуд зурмна то бүрткж баһрулна. Эдн йоста санитармуд болжана. Давсн жилин чилгчәс авн дамшлтын диг-дараһар электрокүчнә залһлданд хөрн тавн шовуд харслһна эв-арһин комплект тәвгдсмн. Иим оборудованя нилчәр, ик шовуд электрокүчнә сунһугд суусн кемд болн нисж һарсн цагт сунһуг эвдрлһиг гетлүлнә. Хальмг танһчин йиртмж онц кевәр харлһна аһуһар давж һардг болн шовуд нислһнә һазрар һардг электрокүчнә обьектмудыг бәәрн йиртмж харлһна көдләчнрлә хамдан специалистнр илткж авсмн. Тер тоод Яшкулин болн Үстин райод орв. Руслан Меджидовин келсәр, цаг сольгдад, шовуцд харслһна эв-арһ бас шинрүлгджәнә. Ода өдгә цагин некврлә ирлцәтә полимерн эв-арһ бәәнә. Иим оборудовань сәәнәр шовуд харсна. Эдниг теегин бүргд шовуд олар үкдг һазрт углж тәвсмн.
Цесг цагин эргцд энергетикүд шовуд нисдг һазрин өөр бәәх электрокүчнә обьектмудт оперативн бәәдл шинжлж хәләхмн. Энүнә ашт йиртмж харлһна керг-үүлдврмүд бүрдәгдж давулгдхмн.
Ээнән Делгр, Хулхачин Николай
