Танһчин райодар хөөдәс төл авлһна көдлмш гүргүдән орсн бәәнә

Танһчин райодар хөөдәс төл авлһна көдлмш гүргүдән орсн бәәнә. Эннь хөөчнрин хамгин дааврта кем мөн. Мана үүдәгч баг Хар-, азра районд күрч эн дааврта көдлмш тенд яһж давжахарнь соньмсв.

Танһчин эдл-ахусар хөөдәс төл авлһна дааврта көдлмш давжана. Эн цагт хөөчнрт сакманшикүд ик дөнг-нөкдән күргдг болжана. Хар-һазра района «Ставропольский» нертә ГУП-н медлд бәәх Хадижа Чупанован хош деер зурһан зун толһа хөд бәәнә. Эндр өдр эднә өрәлнь хурһлчксн болжана. Хөд хурһлһна көдлмш энд апрель сарин нег шинд эклсмн. Эн цагин эргцт авгдсн һурвн зун тәвн бичкн-бичкн өкәр хурһд нарна толянд тоглж гүүлджәцхәнә.

Төл авлһна эн кергт орлцжах сакманшик андрей селәнә эдл-ахун көдлмшиг сән меднә. Жил болһн эн дааврта кергт орлцдг күн болжана.

Хөөч болһн хәләвртән бәәх малмудтан оньган өгч көдлнә. Эдл-ахун медлд бәәх хөөчнрин арвн нәәмн хошт найн сакманшикүд орлцж дөнгән күргжәнә. Сарин эргцд көдлсн төләдән эдн нәәмн дундур минһн арслнг жалв авна.

Эн жил төл авлһна көдлмш сән таалд давжана. Зун хөөнә тоод зун хурһ авх седклтәвидн. Дәкәд болхла хөд кирһлһнә кемд хөн болһнас һурвад кило ноос авхар зуралжанавидн-гиж эдл-ахун зоотехник Джанр Дорджиев келнә. «Ставропольский» эдл-ахуд бәәх һучн зурһан хөөчнрин хошмудт арвн негн минһн хурһлх грозненск тохма хөд бәәнә, цуһар цевр, цатхлнг гиж эдл-ахун малын эмч-селекционер Вячеслав Гучинов келнә.

Хөөдәс төл авлһна ашмуд районд апрель сарин чилгчәр, май сарин эклцәр диглгдхмн. Зун хөөнәс зун хурһавх, нег толһа хөн болһнас 4 кило ноос кирһж авх зураһан цугтан эрк биш күцәхәр зүткжәнә. Эн халхар эднд цуг арһ бәәнә гиж темдглх кергтә. Хаврин сәәхн дулан өдрмүд эднд хойр дам урмд өгчәнә.

Санкун Кермен, Бадмаран Владислав