Танһчин малчнр үвләс әмд менд һархин төлә белдвр кежәнә

Үвлин цаг өөрдж йовна. Танһчин малчнр үвләс әмд менд һархин төлә белдвр кежәнә. Өдр ирвәс тенгрин бәәдл сольгдад бәәнә, эн учрар кесг малчнр ясврин көдлмшән ода күртл дуусад уга. Зәрм эдл ахус белдврин көдлмшән кезәнә кечксн бәәнә.

Ах хөөч Патиман Багоманован эдл аху өөрджәх үвлин кемд белн бәәнә. Эдн малмудтан хот болн өвсн зунын кемд белдж авсн билә. Ах хөөч Патимат Багоманова хаша-хаацан ясв. Күүкд күүнә келсәр эн жилд тенгрин бәәдл сән, дегт киитн болсн уга, салькн шүрүн үләсн уга. Хур чигн орсн уга. Давсн жиллә дүнцулхлә тегнрин бәәдл йир киитн билә. Эн жилд үвл дулан болх зөвтә гиж ах хөөч маднд келж өглә.

Дегд киитн үвл болхла малмуд мууһар үвлзнә. Хотн өвсн күртхш. Үвлин цагт дулан болхла бидн малмудан теегт идшлнәвидн. Киитн үвлд эдн хашадан зогсна.

Эн жилд хар һазра сарул селәнә муниципальн городовиковин нер зүүжәх предрприять зун хөөдәс зун хурһд авв. Иргч жилд эдн бас малмудас сән төл авх зурата бәәнә. Эн жилд тавн минһн хөд болн зун бод мал үвлзх. Зоотехник Ичкән Баиран келсәр эн жилд эн эдл аху малмудтан шүрүн хот ик урдаснть белдж авсн билә. Эднә эдл аху уста һарзт бәәнә.

Зоотехник ичкән баиран келсәр талдан эдл ахус усн угаһар йир түрнә, һазр дор гүүжәсн усн йир һашун болна. Арһ уга болад малмуд ус ууна. Эн жилд ямаран үвл болх күн медхш, ик зуудан бәәсн эдл ахус эн үвлд белн бәәнә.

Эн жилд бүкл танһчар авад хәләхлә зурһан зун далн бод мал, хойр дундур сай хөд үвлзх. Хальмг танһчин эдл ахун министерствин тоолврар эндр өдр хотар танһчин эдл ахус найн нәәмн процентд белн бәәнә.

Үвлин цагт белдж авсн хотн танһчин эдл ахуст күрх зөвтә гиж хальмг танһчин эдл ахун специалистнр маднд келж өгв. Эн жилд зунын цагт хур орсн уга, малчнр хагсу өвс хадад хураж авв. малчнр һан халунд теегт һарад малд хот белдж авсн билә. Тегәд эн жилд үвләс әмд менд һарх зөвтә.

Дмитрин Татьяна, Очра Сергей