Сүл цагт генткн киитн болснас көлтә, танһчин олн әмтн үүмәд бәәв
Йиртмжд му тенгрин бәәдл уга гиж дуунд келгднә. Тер бийнь генткн киитн болснас көлтә, олн әмтн үүмәд бәәв. Танһчин зәрм улс үвлин дулан хувц хулдад авад уга бәәж. Дәкәд болхла намрин чилгчәр цасн чигн орх таавр бәәнә. Нарн һарсн бийнь, аһарин кемжән ноль градусас дуларчахш.
Танһчин метеоцутхлнгин көдләч Галина Олокина келсәр, иим тенгрин бәәдл Хальмг танчһд урднь чигн тогтдг билә. Зәрмдән аһарин кемжән арвн градус күртл киитрдг бәәсмн. Галина Алокина келсәр, ноябрь сард иим тенгрин бәәдл өвәрц биш. Иим киитн өдрмүд удан болшго. Удл уга аһарин кемжән дуларх. Өдртнь аһарин кемжән дулан талднь өөдлх.
Гитрометеоцутхлнгин тааврар, иргч өдрмүдт хур-цасн орх, салькна күчн чанһрхмн, нигт будн буух. Хаалһс сөөднь болн өрүнднь мөстхмн. Элст балһсна әмтн киитн өдрмүдиг яһж тосв. Эн күүкд күүнә келсәр, киитн өдрмүд харш болсн уга. Урднь ноябрин доланд демонстрацд бидн зунын гиигн хувцтаһан йовдг биләвидн.
Тер саамд бичкдүдт киитн өдрмүд боомтг учрасн уга. Көвүд — күүкд гиигн хувцтаһан һаза йовна. Һаза болхла аһарин кемжән нәәмн градуст киитрв. Блицы дулан өдрмүд күләжәнәв гиж эн көвүн келнә. Эн күүкнә келсәр, цасн орхла сән болх билә.
Сүл цагт тогтсн киитн өдрмүдт олн әмтн царцад гемтх гиж эмчнр үүмжәнә. Элст балһсна эрүл-менд харлһна әнгин көдләчнрин иткүлсәр, ода деерән грипп гемәр әмтн баһар гемтжәнә. Эн әнгин ахлачин дарук Земфира Мутулован келсәр, эндр өдрт һучн хойр минһн бичкдүд саглулһна тәрлһнд орв. Деед болн дунд сурһулин оютнрин төлә дәкәд тавн минһн эм ирх зөвтә.
Элстин эрүл-менд харлһна заллтин специалистнрин тоолврар, давсн жилд болн эн жил урдк жилмүдлә дүнцүлхлә, грипп болн ОРВИ гемәр әмтн баһар гемнжәнә. Давсн үвләр грипп гемәр гемтлһнә кемжән өөдлсн билә. Тиигхд ОРВИ гемәр арвн нәәмн минһн Элст балһсна улс гемтв, эднәс арвн тавн минһн бичкдүд. Грипп гемәр зун һун һурвн күн гемтв. Давсн жилд танһчин цуг улсас йирн тавн процентнь саглулгч тәрлһ авснас иштә, грипп гем икәр тархагдсн уга. Эн жил ОРВИ гемәр гемтсн улсин кемжән әәмшгтә кемжәнәс икдсн уга. Тер бийнь саглулгч тәрлһн цаарандан кегджәнә. Эндр өдрт бичкдүдин ик зунь иим тәрлһнд орв. Удл уга танһчин жирн долан бөдүн улс тәрлһ авхмн. Медицинск көдләчнриг ОРВИ болн грипп гемәс харслһна төлә жил болһн йисн зун минһн арслнг кергтә болна. Болв хотл балһсна бюджет иим мөнг йилһж өгхий аль угай, ода медгджәхш.
Колдан Наталья, Дукмана Николай
