Сурһульчнр ЕГЭ-н шүүвр өгчәнә
Эндр школан төгсжәх сурһульчнр орс келнә ЕГЭ-н шүүвр өгв. ЕГЭ-н шүүвриг Элстин техническ лицейд тавн балһсна школмудас 1З0 күн өгв. Давсн жилмүдлә эдл, эн жил сурһульчнр ЕГЭ-н шүүвр өгчәх пунктд мобильн телефо авч ирх зөв уга. Иим телефо олзлсн цагт эдн шүүврәсн көөгдәд, орс келнә ЕГЭ-н шүүвриг ирх жилд өгх. Күн болһн эндр өдр интернетд орад шүүврин хәрүг олж авчана. Эн туст Рособрнадзорин әнгин специалистнр ноолда кежәнә. Шүүврин өмн эдн ЕГЭ-н буру хәрүһинь орулх саната. Цөн өдр хооран сурһульчнр информатикин, биологийн болн туужин ЕГЭ-н шүүвр өгсн билә. Июнь сарин 15 күртл танһчин школмудын көвүд күүкд обшествознанин, географин, литературин болн физикин предметар шүүвр өгх саната. Ирх долан хонгт сурһульчнр талын келәр болн химин предметмүдәр шүүврән өгх.
