Сокту жолачнрин то баһржахш
Эн жилин сентябрин нег шинәс авн соктуһар маши залж йовсн улсиг чанһ засгла харһулх закан һарв. Тер бийнь соктуһар маши залж йовсн улсин то баһрсн уга. Сүл хойр сарин эргцд мировой зарһчнр эн халхар далн йисн керг хәләв. Эннь зуг Элст балһсар кесн то-диг.
Хаалһар йовлһна зака эвдсн улс дунд нурһлж һуч күрәд уга баһчуд. Зәрмдән тәв һарсн залу улс чигн харһна. Эдн цугтан көдлжәх әмтн. Харм төрхд, иим улс соктуһар маши залж йовад, эннь ямаран му ашта болхин тускар санжахш. Энүнә тускар зарһчнр иим то-диг кев. Шин закан үүлдврт орснас авн административн засгла тәвн тавн күн харһулгдв. Эдн цугтан һучаһад минһн арслнг ял өгх зөвтә. Хойрдад соктуһар маши зхалж йовад бәргдсн жолачнр тәвн минһн арслнг ялд унх зөвтә эс гиж арвн тавн хонгтан бәрәнд бәәх зөвтә. Ода иим хойр күн бәргдв. Энүнә тускар тодрха шинжлт кесн хөөн зарһчнр засгин шиидвр авна.
Мировой юстицин төрмүдин церглтин һардачин дарук Татьяна Тимошеван келсәр, администравтин бәрәнд зуг шишлнг спискд орсн улсиг авч болх. Саата күүкд улсиг, бичкдүдтә экнриг, инвалид улсиг болн медәтә улсиг бәрәнд авч болшго. Энүнә тускар мировйо зарһч шиидвр батлж авна. Ут-тоодан соктуһар маши залж йовсн улсин ял нег сай дөрвн зун арвн минһн арслнг тогтажана. Эн мөнгн бюджетд орх зөвтә.
Кемр соктуһар маши залж йовад медицинск шинжлтд эс орхар седсн улс бас һучн минһн арслнг ял өгх закан бәәнә. Ода иим хөрн дөрвн күн бәргдв. Урднь иим кевәр зака эвдхлә административн засг хойр сар бәәсмн. Тегәд зака эвдсн улс эн болзгиг олн-зүсн учр олж авад хооран саадг билә. Үлгүрнь, больничн цаас авдг бәәсмн. Ода болхла иим керг хәләхин болзгнь нег жилд күрв. Сүл цагт сокту күүкд улс маши залж йвоснь бас бәргднә. Келхд, көдлмшч өдр сокту улсин то өснә. Өдр болһн автоинспектормуд арвн сокту жолачиг бәрж авна. Эн жилин йисн сарин эргцд хойр минһн һурвн зун жирн тавн сокту жолач бәргдв. Эннь давсн жиллә дүнцүлхлә жирн дөврн күүнд ик болжана. Элст балһсна бәәрн күн Юрий Бадма-Убушиевин тоолврар, засг чанһаснь хаалһар әәмшг угаһар йовлһнд сән нилсән күргх зөвтә. Хөрн хйор настадан әрк уучкад маши залсн бәәж. Ода болхла кергтә кемжәнәс зака эвдж болшго.
Жолач Юрий Бадма-Убушиевин келсәр, урдлнь соктуһар маши залдг бәәж. Баһ настадан иим йовдл һардг билә. Тиигхд бас засгла харһад, маши залх зөвән геедг бәәсмн.
"н залу күүнә келсәр, закан чанһрсн цагт әмтн ухалх. Соктуһар маши залдган уурх. Мана танһчд һучн минһн арслнг олж авхд күнд болх.
ГИБДД-н көдләчнрин тоолврар, танһчин әмтн соктуһар маши залдг йовдлмудла бас ноолда кеж чадх. Энүнә төлә эдн полицин дежрун әнгд иим йовдлмудын тускар зәнглж чаджана. Соктуһар маши залж йовсн улсас көлтәарвн зурһан күн әмнәсн хацһв, жирн күн шавтв. Ут-тоодан сокту жолачнр орлцата дөчн хйор зеткртә йовдл хаалһд учрв. Эннь эн жилин йисн сарин то-диг болжана.
Ээнән Ольга, Мятежный Максим
