Сентябрин нег шинд Көтчнр селәнд бичкдүдин сад ясврин хөөн көдлх

Бичкдүдин садмудт чеерүд удл уга төгсх. Көтчнрә района цутхлнг селәнд шинрүлһнә болн ясврин көдлмшин хөөн дошкольн учреждень секгдхмн. Сентябрин нег шинд нааран йирн тавн көвүд-күүкд ирх. Эндр өдрт садт орх зун дөчн бичкдүд бәәрн администрацд чеерүдт зогсжана. Ромашка нертә бичкдүдин сад секхинь эдн ода тенкән уга гидгәр күләжәнә.

Хойр наста Сарнг экиннь өөрәс һархш. Светлана Васькаеван келсәр, өдрин дуусн көвү хәләх кергтә болна. Талдан көвүд-күүкдлә наадхдан дурн уга, нег үлү талдан бичкдүдлә нааддг дасад уга. Сарнг көвүн төрхлә, энүг тер дарунь садт орхин төлә чеерүдт бичүлв. Көтчнрә района бәәрн күүкд күн Светлана Васькаеван келсәр, эрк биш бичкдүдин садт одх кергтә. Ода чеерүд дегд ик, нег садт цугтан ордг орм уга болжана.

Болв удл уга сентябрь сард Сарнг болн нань гбичкн көвүд-күүкд сарул ке-сәәхн садт одхмн. Бичкдүдин садын һардач Наталья Учаеван келсәр, энд бичкдүд наадг хора бәәнә, шин мебель хулдж авч. Федеральн программар тавн зун дөчн нәәмн минһн арслнг ирв.

Өдгә цагин некврлә ирлцәтә көвүд-күүкд наадг комплекс бичкдүдин деглртд сән нилчән күргх гиж Көтчнр селәнә бичкдүдин садын һардач Наталья Усаева келнә. Хойр давхрта садын герт ясврин көдлмш эн жилин март сард эклсмн. Эн цагин туршарт энд электрокүчнә сунһуг сольв, герл орулв. Тер мет хөрн зурһан шин үүдн углж тәвгдв. Хамгин ик кергнь — нааран ик кезәнәс авн күләжәсн газ ирв.

Көтчнрә РМО-н администрацин ахлачин негдгч дарук Геннадий Азотовин келсәр, бичкдүдинс адын гер яслһна көдлмшт ут-тоодан тавн зун дөчн минһн арслнг һарв. Энд шин сантехник углж тәвгдх, тер тоод шин унитазмуд болн раковин хулдж авгдх. Талдан кергтә материал бас хулдж авгдв.

Ясврин көдлмшин йовудт бичкдүдин садын цуг хорас шинрүлгдв, тер тоод методкабинет, көгжмин зал, бичкдүд унттг хорас сәәхрв. Тер мет хот кедг хорад цуг кергтә оборудовань белн болв. Ода зун усна сурвлж татхла, ясврин цуг көдлмш төгсв гиж келж болх.

Арстана Светлана, Котина Валерий