Селәнә эмчнрт нег сай арслнг дөнцл мөнгн өггджәнә
Баһ наста селәнә эмчд нег сай нертә программин нилчәр райодын цутхлнг больницд болн хол селәд-поселкст эмчнр олар одад көдлжәнә. Көтчнрә районд федеральн программд арвн дөрвн баһ наста специалист орлцхар шиидв. Эдн государствас нег сай дөнцл мөнг авв.
Эн көвүнә хора, негдгч класст сурна. Ке-сәәхн обой бәәнә. Бичкдүдт таасгдна гиж экнь келв. Эмч-терапевт Данара Манджиева холл селәнд иим герт бәәхин тускар ухалжасн уга бәәж. Энүг эврән ухалж төсвинь кев. Шин гертнь у-сарул зал, бичкдүдин хора, хот-кедг бәәрн бәәнә. болн талдан чигн бәәцин цуг таал бүрдәгдв. Бәәцин таал балһсна патьрмудла әдл бюолжана. Астраханск медицинск академь төгсәснә хөөн, Көтчнрә района больницд ирж көдлв. Цөн жил болад балһсна эрүл-мендин цутхлнгд орж көдлв. Земск эмчнрт правительствин шиидврәр, дөнцл мөнгн гиж өггдх нег сай арслнгин төлә селән һазрт одад көдлх санан орв. Баһ наста эмчс дәкнәс селәнд көдлх шиидвр авв. Энд хәрд һарад өрк-бүлән тогтав.
Көтчнрә района больницин эмч —терапевт Данара Манджиеван келсәр, кемр иим программ уга болсн болхла, селән һазрт одад көдлх зура уга билә. Баһ наста специалистн нег сай арслнг олж чадшго. Государств баһ наста эмчнриг дөннжәнә. Тегәд нааран ирх дурн күрв. Тавн жилд көдлснә хөөн, энд үлдәд көдлх санан бәәнә.
Эмч анестезиолог Санл Катмашевин келсәр, деед сурһуль төгсәсн цагт шин программ экләд күцәгдв. Удан ухаллго федеарльн программд орлцхар шиидв. Төрж-өссн боссн селәндән үлдәд көдлв. Дамшлтта эмчнрин дөнгәр баһ наста специалист амр биш көдлмштән дамшлт хоршав. Талдан эмчнрлә әдл нег сай арслнгар бәәдг гер хулдж авх саната. Эмчин авх дөнцл мөнгиг яһж эдн олзлхин тускар заканд чанһ неквр уга. Тегәд эдн эврәннь хәләцәр мөнг олзлж чаджана. Эмч анестезиолог Санл Катмашевин келсәр, гертән көдлснь санамр болн төвкнүн болна. Бәәдг гер эс гиж патьр хулдж авх зура бәәнә. Эмчнрин ик зунь өрк-бүлтә. Эднд нег сай арслнг сән дөн болжана.
Көтчнрә района больницд ирж көдлжәх специалистнр дунд олна дамшлтын эмчнр, участкин терапевтмуд бәәнә. Эдн цуг халхар кергтә медицинск дөн күргж чадхмн. Көтчнрә района больницин ах эамч Виктор Эльдеевин келсәр, ода селәнә больницд талдан райодын медицинск учрежденьлә әдл хаһлх төрмүд дала. Болв эдн арһ-чидләрн халһгджана. Больницин герт капитальн ясвр кегдв, шин медицинск оборудовань ирв. Тегәд селән һазрт нег сай дөнцл мөнг авсн эмчнр өдгәц агин таалд көдлх арһ бәәнә.
Көтчнрә района больницин ах эмч Виктор Эльдеевин келсәр, эн программар мана больницд арвн дөрвн баһ наста специалист ирж көдлжәнә. Нег жилин эргцд көдләд, эдн бийән сән халхаснь үзүлв. Ода баһ наста эмчнрәс хойр күүкд күн декретн амрлһн һарх зөвтә. Июль сард нүднә эмч болн эич инфекционист дутх. Танһчин эрүл-менд харлһан министерствд иим эмчнр кергтә гиж эрлһ орулж өгч. Эн жил деед сурһуль төгсәсн әмчнрәс нааран ирж көдлх улс олдх зөвтә.
Баһ наста эмчнр селәдт ирж көдлхлә, бәәрн әмтн талдан һазрт одлго, дор ормдан кергтә медицинск туслмж авч чаджана. Ямаран чигн цагт дөн болх специалистнр өөрнь бәәхнь селәнә улст сән урмд өгчәнә.
Ээнән Ольга, Колдан Церн
