Ростовск областин Ажинов күүтрт хальмгин салдснрин санлыг әрүнәр хадһлжана
Хальмгин салу мөрнә зун арвдгч дивизь бүрдснә далн жилин өөнд, Тенг һолын көвәд дәәлдән болсна далн жилин өөнд болн Хальмгин зун арвдгч мөрнә салу дивизин командир Василий Хомутниковин төрсн зун хөрдгч жилин өөнд нерәдгдсн байр Ростовск областьд болв. Байрт орлцсн әмтн төрскән харсад, әмнәсн хаһцсн салдснрин бумбд цецгүд тәвв, соньн концертн программ хәләв. Иим санлын керг бүрдәх седвәр Хальмг танһчар ФСБ-н церглт татв. Энүнд мана үүдәгч бас бас орлцв.
Дәәнд әмнәсн хаһцсн Хальмгин зун арвдгч мөрнә салу дивизин салдснрин санл тодлхар нааран эндр олн улс ирв. Дивизин дәәчнр баатр-зөрмг кевәр далн жил хооран Ажинов күүтр немшнрәс харссмн. Санлын керг-үүлдврмүд орлцхар дивизин командир Василйи Хомутниковин ачнь Хонһр бас ирв.
Тер мет төрскән харсгч сүркә дәәнд орлцсн ветаранмуд митингд бас орлцв. Тер цагт эдн арвн зурһан наста көвүд бәәсмн. Дәәнә ветеран Алексей Колесниковин тодлсар, тер дәәлдәг ода күртл мартжахшв. Немшнриг зогсахар дәәлдж. Хальмгин мөрнә цергин дивизин салдснриг оршасн бәәж. Дәәнә ветеран Иван Нестеровин келсәр, немшнр арвлт угаһар дәврв. Кесг хальмгин салдснр энд цогц-ясан үлдәв.
Далн жил хооран дөчн хойрдгч жилин июль сард Ажинов күүтрт Хальмгин зун арвдгч мөрнә салу дивизин дәәчнр хортнла әмән әрвллго ноолдсмн. Тер саамд немшнрин то эднәс зөвәр ик бәәж, дәкәд болхла фашистнрин техник бас күчтә билә. Энд болсн догшн дәәлдәнд немшин хамгин сән гисн болн шин техникта церг орлцв. Туужин номтнрин тоолврар, тиигхд энд диилдвр бәрх нәәлвр уга билә.
Әрәсән номин академин гуманитарн шинжлт кедг Хальмгин институтын ах көдләч, туужин номин доктор Уташ Очировин келсәр, хальмгин цергә дивизь диилвр бәрж чадсн уга. Тер бийнь мөрнә цергин салдснр цус-махан асхад, баатр кевәр дәәлдәд, немшнриг энд зогсав.
Хальмгин зун арвдгч мөрнә салу дивизин ханьд дөрвн минһн дәәч бәәсмн. Эднәс Ажинов күүтрт болсн дәәлдәнд нег минһн хальмгин салдс әмнәсн хаһцв. Күүтрин бәәрн цуг улс энүнә тускар сәәнәр медж, санлынь хадһлжана. Йирн тавдгч жилд бәәрн селәнә улсин чидләр энд мемориальн самбр секгдв. Энүнд цуг баатрмудын нерн бичгдв. Хальмгин правительствин ахлачин негдгч дарук Вячеслав Илюмжиновин келсәр, танһчин правительствин нерн деерәс салсднрин санл әрүн кеәвр хадһлжахд цуг таанрт ик ханлт өрггджәнә. Хальмгин дәәчнрин баатр йовдл мөнкинд мартгдшго.
Элстин хурлын гелнгүд дәәнд әмнәсн хацһсн улст нерәдж маань умшад, зальврв. Энүнә хөөн митингд орлцачнр зөргтә дәәчнрин санл тодлад, нег минутд тагчг зогсв. Дарунь гиичнр болн бәәрн улс белгүдән нег-негндән бәрүлж өгв. Нааран ирсн артистнр дәәнә цага дуд дуулв, шүлг умшв, хальмг улсин би биилв. Ажинов күүтрт харсад, цус-махан асхад, ясан энд үлдәсн Хальмгин зун арвдгч салу мөрнә цергин дивизин зөрмг салдснрт бәәрн әмтн ик ханлтан өргжәнә.
Санкун Кермн, Хавтхна Анатолий
