Пенсион сангин көдләчнр әмтнд дөн нөкдән күргнә

Хальмг Танһчин Пенсион сангин көдләчнр селәд поселкд одж әмтнд дөн нөкдән күргнә. Давсн жилд эн церглтин көдләчнр өдгә цагин некврлә ирлцжәх оборудовань олзлад цәәлһврин көдлмш күцәһәд олн улст дөнгән күргв. Шидр Пенсион сангин көдләчнр Яшалтан района Октябрьский селәнд одв.

Балһнас хол бәәх селәд поселкин әмтнд пенсион сангд күрг йир күнд болна. Балһсд күрх сул цаг кергтә болжана. Мобильн клиенск церглтд күн болһн кесг жилдән көдлсн стажан медж авна, дәкәд пеньс авзин кергт ямаран цаасн белдх кергтә цугнь эн сангин көдләчнр келж өгнә. Яшалтан района Октябрьский селәнә бәәрн күүкд күн Асмик Цаканян пеньст һарчана тегәд ямаран цаасн белдх кергтәһинь сурж авв.

Иим дөн медәтә улст кергтә, юнгад гихлх насн ирәд көл шарклад өвднә, балһснур күрх йир күнд болна гиж Асмик Цаканян келв. Селәнә бәәрн әмтн — эннь нурһлж пеньст һарчах эс пеньс авчах медәтнр. Пенсион сангин көдләчнр дәкәд болхлаг экин сертификатын мөнгнә тускар баһ наста өрк бүлмүдт цәәлж өгнә.

Пенсион сангин көдләч Евдокия Манжикован келсәр медәтә улст дөн нөкдән күргх кергтә, эврә арһарн эдн балһснур йовж чадхш. Тегәд бидн жил болһн селәдт оч медәтә, олн үртә өрк бүлмүдт нөкд болнавидн. Ирсн әмтнд мана келсн үг эс таасгдшго бидн әрәсән зака үзүләд цеәәлһвр кенәвидн — гиж специалистнр келв.

Эндр өдр медәтнрин пеньс дегд бичкн болжана, хот холын үн өсәд йовна тегәд эн мөнгәр яһж бийән тежәхмн гиж медәтнр алн болна.

Яшалтан района пенсион сангин ахлач Таисия Мазеинова эн тускар медәтнрлә цәәлһврин көдлмш бас давулна. Пеньсин мөнгн олн жилдән көдлсн стажас авгдна, кедү жилдән көдлснь бидн тооһар һарһнавидн гиж Таисия Мазеинова келв.

Яшалтан района Октябрьский селәнә һучн бәәрн күн мобильн пенсион сангин көдләчнрлә харһж дөн авв.Пенсион сангин көдләчнр цөн өдр давад эн района талдан селәд поселкд одад көдлмән цааранднь давулх. Пенсион сангин көдләчнр цәәлһврин көдлмшән намр күртл давулх саната, энүнд цуг танһчин райодын әмтн орхмн.

Бевина Мерген, Ирчин Алексей