Орсин театрт шүүврин марһан болх
Шог наадна болн драмин орсин театрт Хальмгин государственн университетин оютнр дунд шүүвр болх. Энүнә ашт шүүж авгдсн баһчуд Константин Сергиенко бичсн “До свидания, овраг” нертә түүкәр тәвсн “Нохас” нертә көгжмин нааднд орлцх. Шүүвр хойр долан хонгтан болх.
Шүүврин марһан эклтл нег сар үлдв. Һурвдгч курсын оютн Анна Тарбаева оданас авн энүнд белдвр кежәнә. Энүнә келсәр, театральн сцен һарх сән арһ учрв. Театриг эврәннь нүдәрн үзж чаджана. Иим арһ эрк биш олзлхар шиидв.
Хальмгин университетин оютн Анна Тарбаеван келсәр, эн халхар чидлән сөрх арһ учрснд ик байрта бәәнә. Баһ дүүвр насндан олн-зүсн халхар чидлән сөрж болх. Тиигхлә эврәннь дурта эрдмән олж авхд гиигн болх.
Баһчуд орлцх түрүн “Нохас” нертә наадн Константин Сергиенко бичсн “До свидания, овраг” нертә түүкәр тәвгдхмн. Эзн уга нохасин туск көгжмин наадн баһчудт болн бөдүн улст чигн соньн болх. Шин нааднд Әрәсән олн-әмтнә артист, Әрәсән нертә театральн композитор Григорий Гоберник көгжм үүдәхмн. Шог наадна болн драмин орсин театрин литературн-драматическ әнгин һардач Ирина Горяшкиеван келсәр, жанрин чинрәр болхла шин көгжмин нааднд трагедин болн шог наадан янзта болжана. Энүнд әмтн нохасиг яһж зоважахин тускар келгджәнә.
Шин нааднд оютнриг орцлх санан “Посвяшение в студенты” нертә фестивалин йовудт орв. Мана танһчд билгтә баһчуд дала. Эднд Владислав Константинов онц оньг тусхаһад, шүүврин марһанд орлцх үрвр кев. Марһана ашт билгтә арвн көвүн-күүкн шүүж авгдхмн. Шүүврт орлцад, чидлән сөрх санан бәәнә. Эрк биш марһанд орлх зура бәәнә. Эврәннь тускар эс меджәсн занг медж авх учрх. иим керг олз-туста болх зөвтә. Орсин театр Хальмгин университетла хамдан иим керг күцәжәхнь соньн болжана.
Иргчдән шог наадна болн драмин орсин театрт Хальмгин государственн университетин дөнгәр театральн студь бүрдәх зура бәәнә.
Ээнән Делгр, Котина Валерий
