Орсин театр оютнр дундас билгтә баһчуд шүүж авв

Шог наадна болн драмин орсин театр Хальмгин государственн университетин оютнр дунд шүврин марһа бүрдәж давулв. Энүнә ашт шүүгдж авгдсн билгтә баһчуд Константин Сергиенко бичсн “Прошай, овраг” түүкәр тәвгдх “Нохас” нертә шин нааднд орлцх. Шүүврин ашт көгжмин болн артистын билгтә арвн көвүд-күүкд шүүгдж авгдв.

Шог наадна болн драмин орсин театр оютнр дунд шүүврин марһан бүрдәв. Энүнә ашт арвн баһчуд шүүж авгдв. Эдн “Нохас” нертә нааднд орлцх.

Түрүн болж сцен деер хойрдгч курсын оют Геннадий Кикеев һарв. Эн көвүн Сергей Есенина шүлгәр үүдәсн “Москва” нертә ду дуулж өгв. Дуулхдан бичкнәс авн дурта. Хамгин икәр Геннадий енгсг сәәхн зүрк авлм ду дуулхдан дурта. Оют Геннадий Кикеевин келсәр, сценас әәжәхш. Ду дуулжаһад тас үүмсн уга. Оют Геннадий Кикеевин келсәр, театральн сцен деер һарад нааднд наадх шүүврин иим марһанд түрүн болж орлцжана. Энүг шүүж авхла, иргчдән театральн училишд орх санан бәәнә.

Хойрдгч курсын оютн Валентина Бокова болхла марһанд тохнята белдвр кеж. Эн күүкн бас түрүн болж иим ик сцен деер һарчана. Күүкн “Старый клен” нертә ду дуулв. Икәр үүмжәснь ил медгдв. Эзн уга нохасин туск тууж энүнд соньн болж медгдв. Оютн Валентина Бокован келсәр, иим марһан олз-туста болна. Иргчдән иим эрдмәр цаарандан сурх зура бәәнә.

Режиссер Владислав Константиновин темдглсәр, эзн уга нохасин туск наадн баһчудт болн бөдүн улст чигн соньн болх зөвтә. Бийән бахмжтаһар күн гиж нерәджәх улс талдан улст зовлнг учралго, эзн уга нохасиг зовасна тускар “Нохас” нертә нааднд келгджәнә.Шин наадан төлә Әрәсән нертә театральн композитор Григорий Гоберник көгжм бичжәнә. Режиссер, Марий Эл республикин сойлын ачта үүлдәч Владислав Константиновин келсәр, оютнриг түргн кевәр дасхдг студий көдлх. Эдн актерин эрдм дасх, ду дуулдг эрдмтә болх. Иим нааднд орлцад, баһчуд дамшлт авх.

Оютнр орлцата шин наадыг эн намрар үзж болх. Шин наад хәләснә хөөн, баһчудын артистын билгиг үнлж болх, эврәннь дүрмүдән яһж үзүлснә тускар келж болхмн.

Ээнән Делгр, Котина Валерий