Олн халхта цутхлнг әмтнд туслмж күргжәнә
Государственн болн муниципальн туслмж күргдг олн халхта цутхлнг эндр өдрт улсин тавн минһн эрлһәр, туслмж күргв. Дәкәд нег тодлад келхлә, шин цутхлнг эн жилин январин арвн доланд Элстин негдгч микрорайонд секгдв. Шин цутхлнгд әмтн түргн кевәр сән чинртә туслмж авч чадна. Удл уга цутхлнгд талдан чигн кергтә туслмж авч болх.
Татьяна Стрельцова шин олн халхта цутхлнгд түрүн болж иржәнә. Залунь инвалид болад льгот авх зөвинь темдглж авхар нааран ирж. Цөн өдр хөөн авальнь һурвдгч багин инвалид болв. Ода коммунальн туслжмин зәрминь данцалһна мөнг авх зөв авсмн. Шин цутхлнгд чеерүд уга болн әмтн үүмжәхш. Эннь Татьяна Васильевнад алнг болв. Татьяна Стрельцова келсәр, иим цутхлнг секснь сән керг. Урднь ик чеерүдт зогсдг бәәж. Өрәл өдр сууһад, кергтә справкиг зуг үдин хөөн авдг бәәж.
Нааран ирсн улсла көдлх тодрха эв-арһ олзлгджахнь цутхлнгд орж йовхла ил үзгднә. Государственн болн муниципальн органмудас справк авхин төлә йисн терз көдлжәнә. Операционн залд углж тәвгдсн терминалас урдань талончик авх кергтә. Энүнә хөөн таниг специалист дуудхинь күләх кергтә. Энүнә тускар шишлнг герләр зәнглнә. Энд көдлжәх специалист болһн деед сурһульта. Тер мет Әрәсән олн-әмтнә эдл-ахун болн государственн церглтин академин Волгоградск филиалд немр белдвр кесмн. Олн халхта цутхлнгин негдгч категорьта специалист Екатерина Церенован келсәр, цутхлнгин көдләчнрт көдлхд эвтә болв. Әмтн олар цуглрхш. Тер мет олн халхар шин медрл авх арһ учрв. Эднә көдлмшт сән нилчән күргжәнә.
Өдр болһн нарн өдр бишнкнь өрүн нәәмн часас авн асхн хөрн час күртл цутхлнгин арвн специалист хойр селгәһәр көдлнә. Йисн терзд алвна болн темдглж бичлһнә документмуд, госреестрин справк, олн-зүсн дөнцл мөнг авхин төлә кергтә цаас энд авч болх. Ут-тоодан дөчн негн туслмж авч болжана. Олн халхта цутхлнгин директорин келсәр, ода деерән хамгин олн әмтн өрк-бүлин ханин тускар, герин дегтрәс бичлһ авх болн бәәсн һазртан темдглж бичүлһнә документ авчана. Эндр өдрт цутхлнгин көдләчнр тавн минһн справк һарһж өгв. Тер тоод нег минһн зурһан күүнд цутхлнгин өгдг туслмжин тускар цәәлһвр өггдв. Олн халхта цутхлнг секснә хөөн зәрм федеральн церглтсин көдлмш невчк гиигрв.
Государственн болн муниципальн туслжм күргдг олн халхта цутхлнгин директор Санж Хулхачиевин келсәр, урднь миграционн церглтд жирн күн ирдг бәәж. Ода эдн кергтә цаас цутхлнгд авч чаджана. Цутхлнгин көдлмшин цаг иксднәс авн чеерүд баһрв.
Эн жилин апрель сард цутхлнгин күрдг туслжм икдх. Ода цутхлнгин хойр көдләч шишлнг сурһуль дасжана. Эн көдләч паспорт сольж авлһна болн онц арһлачнриг темдглж бичлһнә халхар көдлх. Олн халхта цутхлнгд өдгәц агин оборудовань бәәсн бийнь болн энд күргдг туслжм сән чинртәһәр күрдг бийнь элстихн энүг урдк кеәвр горсправка гиж нерәднә.
Хавтхна Элла, Хавтхна Анатолий
