Октябрьск районд тутрһ хуралһна көдлмш төгсв
Октябрьск района тутрһчнр тутрһ хураж авлһна көдлмшән төгсәв. Давсн жиллә дүнцүлхлә эн жил тутрһин урһц сән болв. Дундлад гектар болһнас дөчн центнер хураж авгдв.
Станислав Бадмаев Октябрин тәвн жилин нертә эдл-ахуд һурвн жилдән көдлжәнә. Талдан хойр зун көдләчлә хамдан селәнә эдл-ахун производствд бүкл жилдән амрлго көдлнә. Цон өдр хооран эдн тутрһин урһц хураж авлһна дааврта көдлмшән төгсәв. Зунын һан халунд чидлән нөөлго арднь орж урһаж авсн тутрһиг ода мишкд кесн цагт иим буудя ямаран ик үнтә болдгинь ода ирж медгднә гиж Станилав келнә. Тегәд чигн энүг геедрлт угаһар эд-бод кеж авх кергтә. Окятбрин тәвн жилин нертә эдл-ахун көдләч Станислав Бадмаевин келсәр, ода тутрһиг эд-бод кеһәд, Ростов балһснд “КамАЗ” машинд ачжана.
Өдгә цагт Бадмаевихна өрк-бүлд һурвн бичкдүд өсжәнә. Тегәд авальтаһан эврәннь совхоздан эдн нәәлжәнә. көдләд мөнг олна, туртрһ чигн эдн авх зөвтә. Сардан Станислав арвн тавн-арвн зурһан минһн жалв авчана.
Октябрьск района администрацин ахлач Санл Адьяевин келсәр, эн жил районд тутрһин урһц сән болв. Нег гектарас дөч һар центнер цокж авгдв. Әрәсәд болхла, тер тоод Краснодарск крайд гектар болһнас далн негн центнер хураж авгджана. Иим кәцәмжд зүткх кергтә.
Эдл-аху һарджах Владимир Цыбулин һучн жилдән иим өөдән үзмж бәрж көдлжәнә. Эннь бас амр керг биш болжана. Октябрин тәвн жилин нертә эдл-ахун ахлач Владимир Цыбулина келсәр, хамгин һол кергнь — зунын кемд цаглань тутрһиг услх кергтә. Кергтх ус өгхлә, урһц сән болна. Сүл һурвн жилд тутһрин үн баһрад йовна. Тер саамд минеральн бордврин, машина тосн-түләнә сольврин әнгсин үн өсжәнә. Тегәд эн туст селәнә эдл-ахусд дөнцл мөнг өгч дөннх кергтә. Иим производств зогсах керг уга. Тутрһ эс урһхла талдан продукц чигн бас урһаж авч болшго. Цуг көдлмш хоорндан залһлдата. Эн жил эдл-аху хөрн минһн рулон тутрһин солом, арвн долан минһн рулон өвс болн һурвн дундур минһн тонн ичмәнә буудя үвлдж белдж авла.
Ода тутрһ хулддг үн бичкн кевәрн үлдв. Тегәд өдгә цагт рынкин зака сәәнәр медж, тутрһан сән талснь талын һазрт зарлж үзүлх кергтә. Эн дааврта төриг эдл-ахус эврәннь чидләрн хаһлж чаджахш. Энүнд танһчин цуг йосна нөкд болх зөвтә.
Хальмгин олн-әмтнә хуралын ахлач Анатолий Козачкон келсәр, ода эд-бод кесн тутрһин нег килограммнь арвн тавн арслнг күрчәнә. Иим продукциг хол һазрт авч одх кергтә. Энүнд бас мөнгн кергтә Тегәд тутрһ магазидт дөчн арслнгар хулдгджана. Эннь бас хажһр. иим бәәдлиг рынок чиклх зөвтә. Эднд заквр кедг арһ уга. Зуг зөв-йосна халхар көдлх кергтә.
Сенатор Алексей Майоровин тоолврар, Әрәсә нарта-делкән хулд-гүүлгәнә ниицәнд орсна хөөн, эн туст бәәдл чикрх зөвтә. Әрәсән Федерацин хүүвд танһчин олн-әмтнә хуралын элч Алексйе Майоровин келсәр, ода селәнә эдл-ахусд күнд болх. Нарта-делкән предприятьмудла дөрлдәд, эврәннь продукцан хулдх кергтә болжана. Хальмгин селәнә эдл-ахун халхиг дөннх кергтә. ВТО-н таалд күнд бәәдләс һарад, талын һазрт олз-орутаһар эврәннь продукцан хулдх арһ хәәх кергтә.
Эндр өдрт эдл-ахун токмудт долан минһн тонн тутрһин буудя бәәнә. Хальмг танһчд иим культур зуг һучн тавн жилдән урһаж авчана. Краснодарск крайд юолхла тутрһ ик кезәнәс авн урһаж авад, сән дамшлт хоршав. Тер юйинь эн жил хураж авсн хөрн минһн тонн бас сән үзмж болжана. Ода Хальмгт урһаж авсн "Кубань", "Боярин", "Раздольный" нертә тутрһин экн хол һазрт үнлгдж, чинрән өөдлүлжәнә.
Хавтхна Элла, Очра Сергей
