ОБЖ-н предметар танһчин олимпиад болв

Мана танһчин сурһульчнр бачм чинртә йовдлмудт белн бәәнү аль угай? Элст балһснд 9-11-гч классмуд дунд эн төрәр олимпиад болв. Региональн марһан 2 девснгәр бүрдәгдв: теоретическ болн дамшлтын. Танһчин райодын болн хотл балһсна 40 һар көвүд-күүкд олимпиадт орлцад, дииләһән йилһв.

Арвн негдгч классин сурһульч Алексей Курносов ОБЖ-н олимпиадт кесг дәкж орлцла. Хойр жил дарандан танһчин девснгин дөрлдәнд диилвр бәрв. Жил ирвәс даалһвр күндрәд йовна, тер бийнь иим марһанд орлцхд соньн болна гиж эн көвүн келнә. Алексей Курносовин келсәр, олимпиад күндржәнә, энүнд олн әмтн орлцдг болв. Тегәд чигн ода товчлгч марһанд орх жанһрта болжана. Ода дамшлт хоршажанав, медрлән гүүдүлжәнәв. Ода ямаран кевәр ик балл авхин тускар меднә.

ОБЖ-н региональн олимпиад хойр девснгәр болна. Түрүн әнгд дунд болн ах насна багмудт медрлин хойр болн тестин тавн даалһвр көвүд-күүкд күцәнә.Эднә келсәр, эн предметар авсн медрл эднд иргч бәәдл-жирһлд кергтә болх. Школд авсн медрл йир сән нилч күргжәнә. Иим предмет йир олз-туста. Улсин жирһлин хаалһд олн-зүсн йовдл учрна. Эн предмет йир соньн. Багшнр соньн материал өгнә.

Шишлнг жюрин оньгт баһчуд яһж жирһлин күнд бәәдләс һархин, бачм чинртә йовдлмудт яһж үүлдхин, түрүн медицинск дөн күрглһнә тускар келж өгч үзүлв. Марһана хойрдгч өдр бас чанһ неквртә болв. Энүнд көвүд-күүкд бачм чинртә йовдлмудын таалд яһж белн болсан медүлв. Иим даалһвр нег үлү наадна таалд болв. Жюрин келсәр, жил ирвәс иим марһанд орлцжах сурһульчнрин то өсәд йовна. Элстин болн Хальмгин епархийн баһчудла көдлдг әнгин һардач Константин Кирпилевин келсәр, ода баһчуд иим дөрлдәнд сән белдвр кедг болв. Танһчин олимпиадт көвүд-күүкд чанһ шүүврин ашт нааран ирж дөрлдв. Эн жил орлцачнрин то өсв.

Региональн девснгин дииләчнр тогстн авьясар ОБЖ-н цугәрәсән олимпиадт орлцх зөв авх. Әрәсән девснг эн жилин хаврар болх.

Ээнән Делгр, Хулхачин Николай