Нарта-делкән ралли-рейдын дөрвдгч девснг Элст балһснд эклв
Элст балһснд Торһн зам нертә нарта-делкән ралли-рейдын дөрвдгч девснг эклв. Энүнә өмн болсн Хазарские степи нертә һурвдгч девснгд Францин Кристина Лавьелл болн Паскаль Ларокк залсн экипаж диилвр бәрв. Аца зөөдг машид дунд болсн дөрлдәнд Эдурд Николаевин команд түрүн орм эзлв. Краснодарск крайд учрнс усна ик аюлас көлтә марһана товчлгч девснгин зокалд сольвр орулгдв. Урднь дөрлдән Геленджик балһснд июлин арвн һурвнд төгсх зөвтә билә. Ода болхла кеснг сольврин хөөн, ралли-рейд тавн девснгәр Майкоп балһснд июлин арвн хойрла төгсх шиидвр авгдв.
Ралли болсн һазрт энгдән хур орад бәәв. Энүнәс көлтә раллин орлцачнр темдглсн һазрас хойр зун дууна һзарас өмн марһаһан эклв. Марһана эклциг хойр дәкж кегс частан хооран саав. Юнгад гихлә, зарһчнрин комиссьмүдиг, эмчнриг бригадмудыг талдан һазрт күргхин төлә бас цаг кергтә. Элстин аэропортын өөр бәргдсн сегин өөр марһана орлцачнриг журналистнр, командсин нөкднр, гешүд үүмж күләв. Хамгин түрүнд Кристиан Лавьелл залсн францин экипаж ирв. Хальмг танһчд эдн ар-дорд үзг эргәд хойр зун далн тавн дуунад йовад, Яшкуль поселкд ирв. Тенд эдниг асхад орсн хур тосв. Францин эпикаж хаалһдан һурвн час нег минут һучн долан секундт йовж. Кристиан Лавьелл келсәр, Яшкуль селәнә өөр хур зәрм һазрар асхад орв. Тегәд зәрм ормд хаалһ саал мет хальтрата болв, зәрм һазрт чолун мет хату болв. Эднә хөөн Элстин аэропортын өөр бәргдсн сегд Сергей Савенкон автомобиль ирсмн. Онц келхд, эн машиг эн күн эврән һарарн кеж. Энүнә кесн автомобиль космическ кермлә әдл болв. Раллин орлцач Сергей Савенкон келсәр, марһан йир соньн болв, зуг хур орад невчк боомтг учрав.
Ут-тоодан ралли марһанд һазадын хөрн тавн орна жолачнрин команд орлцв, ут-турштан зун хөрн экипаж дөрлдв, тер тоод найн нәәмн ик машин болн аца зөөдг хөрн дөрвн машин марһанд дөрлджәнә. Марһана медиа-директор Эрик Хайруллина келсәр, хальмг танһчд өвәрц кеәвр марһан болна. Теегәр болн элстә һазрар йовх хаалһин зөрц уттулсн бәәж. Иим кевәр жолачнр күнд бәәдлд дөрлдхдән дурта.
Эн саамд экипажмуд дөрвн минһн дуунад йовх даалһврта билә.Болв Кубаньд болсн усна аюлас көлтә маршрутиг невчк хасв. Манһдур марһан төгсх. Эннь харм болжана гиж Торһн зам нертә марһана һардач Семенй Якубов келнә. Торһн зам нертә төсвин ахлач Семен Якубовин келсәр, энүнә тускар жолачнрт зәнглсн бәәж. Хаалһ хассн туск шиидвриг марһана орлцачнр дөннв. Манһдур Геленджик балһсна ормд Майкоп балһснд марһан төгхмн.
Давсн жилд Әрәсән “КамАЗ-мастер” нертә экипаж марһан сүл өдр нүүрлгч орман гееһәд, аштнь тавдгч орм эзлсн билә. Эн жил Әрәсән спортсменмүд диилвр бәрх саната. Энүнд аца зөөдг машидын дунд болжах марһанд орлцжах Эдуард Николаев нәәлжәнә. Аца зөөдг машина залач Эдурад Николаевин келсәр, иим марһанд зурһан жил хоорна орлцж. Тиигхд Әрәсән чемпионатын дөрлдән болсн бәәж. Тиигхд бас кесг өдр хур орла. Тер саамд бальчгт машин унв. Эн саамд бас күнд болв. Невчк эндү һарв. Болв бүклднь авад келхлә, марһан сән йовудтаһар давжана. Машин иим таалд сәәнәр йовв.
Дәкәд нег тодлад келхлә, торһн зам нертә раллин орлцачнр Москва балһсна Улан талвнгас июлин доланд экләд һарч йовла. Дола хонад эдн дөрлдәһән төгсәх зөвтә бәәсмн. Зуг зура больгдад, манһудр эдн сүл марһанд орлцад, дииләчән йилһж авхмн.
Колдан Наталья, Бадмаран Владислав
