Мөнк заль бумбд ясврин көдлмш кегджәнә

Элст балһснд Мөнк заль нертә мемориальн комплекс әрүн һазрин негнь болжана. Нааран дәәнә ветеранмуд, баһчуд болн бичкдүд ирәд, әмнәсн хаһцсн салдснрин санл тодлна. һазр дорас усн һарч ирснәс көлтә комплексин эрсн нурад унжана. Ода бумбиг шинрүлж ясжана.

Мөнк зальд күрдг давшурин өөр бәәх эрсн давсн жилин август сард нурад унсн билә. Элвгәр хур орснас көлтә эрсн нурв. Энүнә хөөн мемориалын эрсиг төмр көшүрәр бүсләд батрулв. Болв эннь нөкд болсн уга. Бумб цаарандан нурад унад, ик әәмшг учрав.

Тосхачнрин багин ах мастер Валентин Дорджиевин келсәр, ода деерән хойр эрсиг шинрүлж ясх кергтә болжана. Эннь деед болн ар үзгин халхд бәәх эрсн. Эдн хамгин икәр эвдрсн билә. Апрелин ихөрн тавн күртл ясврин көдлмш энд төгсх зөвтә. Цааранднь цуг комплекс шинрүлгдх. Эннь капитальн ясвр болжана.

Ода бумб шинрүлж яслһна көдлмш темдглсн зураһар кегджәнә. Хойр эрсиг шинрүлж яслһна көдлмшиг тосхачнрин бригад эн сарин чилгчәр төгсәх зурата. Зунын кемд болхла цуг комплекс ясгдх. Оад энд эрс батрулһна көдлмш кегджәнә. Энүнә хөөн эрсиг керамогранитар кеерүлх. Специалистнрин келсәр, иим материал тәвн жилдән эвдршго. Онц келхд, сүл дәкж мемориалд шинрүлһнә көдлмш найдгч жилмүдт кегдсн билә. Энүнә хөөн зуг бичкн ясврин көдлмш энд кегдв.

Эн залу күүнә темдглсәр, дәәнә цагт әмнәсн хацһсн салдснрин санл мартх зөв угавидн. Фашистнрас төрскн һазран эдн харсж авла. Иим ясврин көдлмш кех кергтә. Эннь сойлын бумб болжана. Эн баһ наста күүнә келсәр, хотл балсһна һардачнр болн государств баатрмудын бумбиг хәләж ясжахнь сән керг. Энтн дәәнә салдснрин санл болжана. Энүг хәләж харх кергтә.

Дорас өсж йовх баһчудт танһчин сойлын болн туужлчг бумбсиг экр биш хадһлх кергтә. Зуг зәрм баһчуд иим ик чинртә төриг сәәнәр меджәхш. Дәкәд нег тодлад келхлә, эн жил мемориальн комплексиг аля-азд көөдг баһчуд бузрдаһад, эрс деер му үгүмд бичсн билә.

Январин яилгчәр Элст балһсна нег школын сурһульчнр бумбин эрс деер ширәр олн-зүсн үгмүд бичәд, му дүрс һарһсн билә. Март сард болхла төрскән харсгч дәәнд әмнәсн хаһцсн салдснрт нерәдгдсн бумбин эрст бүзр үгмүдж бичсн билә. Иим кевәр бумбс эвдхлә, Әрәсән уголовн кодексар чанһ засгла харһулж болх.

Елена Алексенко, Очра Сергей