“Мир без наркотиков” нертә бичкдүдин зургудын марһан болв

Мартын арвн негнд наркотикүдла болн наркобизнесла ноолад келһнә нарта-делкән өдр темдглгдх. Тер мет эн өдр наркоконтролин региональн церглт арвн жилин өөнән темдгдх. Эн өөнлә ирлуүлж эрдм-сурһулин учрежедньсин тавдгч-нәәмдгч классмудын сурһульчнр дунд “Мир без наркотиков” нертә зургудын марһа бүрдәж давулв.

Элст балһсна олн халхта гимназин сурһульч Алина Цеденова түрүн орм эзлв. Зургудын марһан болжахинь медчкәд, тер дарунь эрк-биш орлцхар шиидв. Алина гуашар зурган хурв. Энүнә тоолврар, наркотик олзлсн улсин эрүл-мендин халхд хар тәмк ямаран хорлтан күргхин тускар зургт зурх кергтә. Иим зург күүкн зурж чадв. Алина Цеденован келсәр, кемр наркотик олзлхла уулас хад унснла әдл жирһл төгсж одна. Иим хор әмтн олзлх керг уга.

Хамгин бичкн орлцач номинацд нет наркотикам нертә зург зурсн нәәмн наста Владислав Бадма-Горяев дипломар ачлгдв, мөнгнә мөрәәр мөрәлгдв. Бичкн наста болв чигн, эн көвүн наркотик ямаран хорлтан күргдгин туска күүнә махмуд-цогц эвддгин тускар сәәнәр меднә. Владислав Бадма-Горяевин келсәр, наркотик олзлхмн биш. Иим му авьяс хайх кергтә. Бийән эмнүлтн гиж көвүн дуудвр кежәнә.

Марһанд көвдү-күүкд олн-зүсн нертә зургуд зурв, ут-тоодан дөрвн зун көдлмш жюрин оньгт тусхагдв. Бичкдүдин зург болһн өвәрц болн эврә учр-утхта болв. Марһана бүрдәчнрин келсәр, эн хурц төриг бичкдүд сәәнәр медж үүүдәврмүдән белдж. Энүнә хөөн наркоконтролин шишлнг әнгин дәәчнр бу-селм үзүлв. Көвүд-күүкд энүг һартан авад хәләж чадв. Хамгин икәр пулемет таасгдв. Калашниковин автомат сумн угаһар долан килограмм татна, сумта автомат арвн негн килограмм татна. Шишлнг отрядын үзүлсн дамшлт хәләчкәд, иим отрядт церглх дурн күрв.

Ведомствин һардачнрин темдглсәр, марһана һол күцлнь — наркотикүд олзлһн ямаран хорлтан күргдгин тускар бичкдүд сәәнәр медж авх төр тәвгджәнә. Юнгад гихлә, бичкдүд олар цуглхларн иим хор амсж үзәд, хөөннь наркотикт орж одна. Астраханск областяр әрәсән федеральн наркоконтролин церглтин региональн заллтин ахлачин дарук Георгий Солдаткина келсәр, хамгин түрүнд бичкдүд наркотикт оршгон төләд чик сурһмж өгх күцл тәвгджәнә. Эн туст мана ведомств олн-зүсн эв-арһ хәәж көдлжәнә.

Тер мет эн өдр көвүд-күүкдт наркоконтролин көдләчнрин туск фильм үзүлгдв. Иим харһлтс сән зангшалд тохрад, бчикдүдт олз-туста болх гиж бүрдәһәчнр нәәлжәнә.

Ээнән Делгр, Ирчин Алексей