МЧС-ин сурһуль болв

Хальмгин государственн университетд түүмр шатсн кемд әмт харсж авлһна сурһуль болв. Энүнә һол күцлнь — МЧС-ин, көдләчнрин бюолн оютнрин бачм чинртә йовдлд чидлин болн эв-арһин белдвр бүрткж хәләлһн болжана. Сурһулин йовудт цуг иим чидл болн эв-арһ үзүлгдв.

Түүмр штасн докьяһар оютнр, багшнр болн көдләчнр хораһас һарад әәмгн уга һазрт күрггдв. Цөн минут болад университетин герт Элст балһсна түүмр унтралһна церглтин көдләчнр ирв. Шишлнг техникин болн давшурин дөнгәр МЧС-ин көдләчнр деерк давхрмудас әмт һарһж авв.

Хальмгин университетин цуг сурһулин копусмудт түүмр шатсн кемд автоматическ кевәр докья өгдг систем бәәнә. Университетд көдлмшт оржах әмтн түүмрәс әәмшг уга бәәлһнә тускар эрк биш инструктажд орна. Тер мет оһтнр шишлнг белдвр кенә. Эдн деед сурһулин түүмр унтралһна багд эврә дурар оржана.

Хальмгин универститетин гражданск харслтын әнгин ахлач Чингис Харкебеновин келсәр, хальмгин университетд эврә дурар үүлддг әнг бәәнә. Энүнд хойр зун далн тавн күн орна. Эдн сурһульд орлцв. Түүмр унтрадг церглт иртл эдн цуг кергтә көдлмш кев. Түүмр шатсн хораһас көдләчнр болн оютнр һарһгдв.

Сурһулин даалһврар түүмр унтралһна церглтин көдләчнр хйордгч давхрас әмт һарһж авлһна үүлдвр күцәв. Эдн шатжах герәс давшур олзлж һарч чадсн уга. Утаһар дүүрсн хораһас әмтн шишлнг кииһән авдг аппарат олзлж һарч чадв. Аштнь сурһулин заведеня цуг оютнр болн багшнр харсж авгдв.

Хальмг танһчар МЧС-ин багин ахлачин дарук Евгений Мосолоевин келсәр, эн обьектд зурһан автомобиль, ус зөөдг машин болн нег давшур ирх зөвтә. Ут-тоодан дөчн түүмр унтрадг церглтин көдләч сурһульд орлцв. сУрһулин даалһвр күцәгдв. Хамцу керг-үүлдвр сән болв. МЧС-ин түүмр унтрадг негдгч тойгта әнгин командир Вадим Мацаковин келсәр, түүмр унтрадг церглтин көдләчнр даалһвран сәәнәр күцәж чадв. Иим сурһуль кергтә, энүг дару-дарунь бүрдәхлә сән болх. Энүнд эрдмин дамшлт хоршагдна. Түүмр шатсн кемд оютнр, багшнр бийән яһж бәрхин тускар медх зөвтә.

Сурһуль төгсв. Элст балһсна түүмр унтрадг церглтин көдләчнр болн эврә дурар үүлддг харсачнр әмт харсж авлһна даалһвран өөдән чинртәһәр күцәж чадв. Келхд, хальмгин университетд эннь иим ик түрүн сурһуль болв. Энүнд хотл балһсна түүмр унтрадг цуг әнгс орлцв.

Бевина Мергн, Котина Валерий