Мал өсклһнә халхиг дөннх

Мал өсклһнә халхиг дөннх кергтә. Энүнә тускар танһчин экономикин, болн хулд-гүүлгәнә министрин дарук Боова Бадмаев келв. Экономикин халхар Әрәсә нарта-делкән хулд-гүүлгәнә организацд орсна хөөн, му үлмәһән эс күргхин төләд танһчин государственн йосна органмуд ямаран керг-үүлдврмүд күцәжәхин туск төр хамгин түрүнд правительсвтин сүүрт хәләгдв. Әрәсә ВТО-д орсна хөөн мал өсклһнә халхд, хамгин түрүнд һаха өсклһнә болн бод мал өсклһнә халхд му нилчән күргжәнә.

Әрәсә ВТО-д орсна хөөн мал өсклһнд, тер тоод һаха болн бод мал өсклһнд му нилчән күргв. Энүнә тускар селәнә эдл-ахун министерствин элчнр зәнглв. Үлгүрнь үкрә махн зөвәр кимдрв. Хойр минһн арвн хойрдгч жилд фермермүд бод малыг әмд чиннүрәр нег килограмминь зун-зун арвн арслнгар хулджасн болхла, ода энүнә үн зуг далн арслнг күрчәнә. Специалистнрин келсәр, иим кимд үн селәнә эдл-ахун финансин бәәлд му нилчән күргх. Танһчин селәнә эдл-ахун министрин негдгч дарук Олег Чомподовин келсәр, иим бәәдл цуг Әрәсәд тогтв. Эн халхар региональн министерств ирлцнһү керг-үүлдврмүд күцәжәнә.

Олег Чомподовин келсәр, танһчин мал өсклһнә программ Әрәсән селәнә эдл-ахун министерствд дөнцл мөнг авх шүүврт орв. Танһчин бюджетас энүнә төлә далн тавн һар сай арслнг йилһж өггдх. Тер мет мал бордж өсклһнд онц оньг тусхагдх.

Приютненск района толһач Иван Кравченкон тоолврар, селәнә эдл-ахусд дөнцл мөнг өгх төр хаһлх кергтә.

Иван Кравченкон келсәр, нег гектарт дөрчн зун евро өгх зөвтә. Эннь ВТО-н таалд бичәтә. Әрәсә эврәннь селәнә эдл-ахусд һазр нәәмәдлһнд эс гиж эзнә медлд бәәсн бийнь дөнцл мөнг өгх зөвтә. Министерствин специалистнр дөрчн зун еврон тускар медж авсн болхий аль уга? Ода юнгад зуг арвн евро өгчәхмб? ВТО-н таалар дөрвн зун евро өгх зөвтә.

Эн суврт хальмг танһчин селәнә эдл-ахун министр Петр Ланцанов хәүр өгв.

Петр Ланцановин келсәр, иим тоолврла эдн зөвшәржәнә. Харм төрхд, дөнцл мөнг йилһж өглһнә төр региоан медлд бәәхш. Энүнә тускар федеральн министерствд селвг орулж өгх зура бәәнә. Энүнә тускар һурвн минһн гектарт дөнцл мөнг өгх селвг билә. Зуг эн кемжәнәс хойр холванд баһар өгхәр шиидв. Иргч жилд хәләх кергтә.

Болв эн туст бәәдл дегд му биш. Урһмлын халхиг гектарин кемжәнәс дөнцл мөнгәр тетклһн государственн дөннлһнә шин эв-арһ болжана. Урднь машина тосн-түләнә болн бордврин дөнцл мөнгн өггдг бәәсн билә. Ода шин эв-арһар дөн күрггдх. Танһчин эд-бод кедг промышленностиг дөннлһнә халхар Хальмгт хойр минһн арвн зурһадгч жил күртл шилнг программ күцәгджәнә. Үлгүрнь, иим программар эн жил өдмг болһг предпприятьмудт коммунальн туслмжин мөнгн данцагдв. Тер мет арһлачнр бас дөн уга үлдшго. Октябрьск районд темс эд-бод кедг предприятьмд бүрдәх зура бәәнә.

Октябрьск района толһач Санл Адьяевин келсәр, темс эд-бод кедг предприятьмуд бүрдәһәд, белн хот-хол кеж һарһх санан бәәнә. Иим цех тавн зун жирн тонн темс эд-бод кеж чадх, далн тонн хагсагдсн темс кеж болх. Нег үлү көдлмшч орм һарх.

Района һардврин зура сән ашта болх зөвтә. Тиигхлә темс урһадг арһлачнр эврәннь үн тогтаж чадх. Талын һазрас ирәд темс хулджах хулдачнр иим үн тогтах зөв уга.

Батан Санжирма, Хулхачин Николай