Лаганск района әмтн уудг усн уга үлдх әәмшг бәәнә
Лаганск района бәәрн әмтн уудг усн уга үлдх әәмшг бәәнә. Энүнә төлә цаглань электрокүчнә мөнгн федеральн бюджетас йилһж өггдсн уга. Тегәд насосн станцс көдлжәхш. Калммелиоводхоз предприять Лагань балһсна улсиг болн района селәнә әмтиг усар тетклһнә төлә Оля-Каспийск цувгас Красинск усна боодгт ус орулж өгнә.
Лагань балһсна әмтн ик алнг болжана. Усна өөр бәәчкәд, усн уга болдгнь өвәрц. Пенсионерк Нина Тарасова Жигульскийн нертә уульнцд олн давхрта герт кесг жилдән бәәршлжәнә. Урднь чигн уудг усна төр босдг бәәсмн. Болв тас уудг усн уга үлдх гисн зәнг медәтә күүкд күүг икәр үүмүлв. Дегд ик ус гертән авч хадһлж болшго. Нина Тарасован келсәр, жил болһн зунын кемд халун болхла дачд усн уаг болна. Эннь ик зовлнг болжана.
Дәкәд нег тодлад келхлә, танһчин Калмелиоводхоз Лаганск района бәәрн улст уудг ус Оля-Каспийск цувгас Красинск усна боодгт орулжана. Ода усн нааран иржәхш. Специалистнрин цәәлһсәр, жирн хойрдгч жилд углж тәвгдсн насосн оборудовань хуучрад, эвдрж одв. Энүнә эдлврин болзг ик кезәнә төгслә. Электрокүчнә мөнг данцахин төлә федеральн бюджетас мөнгн иржәхш, тегәд эн оборудованиг цаарандан олзлдг арһ уга болжана. Келхд, давсн жилд Лаганск районд дөрвн сай арслнга уудг ус өгсн бәәж.
Калммелиоводхозин әнгин ахлач Владимир Лиджиевин келсәр, ода станцс хуучрад, эдлврәс һарв. Мана заллт мелиорацин көдлмш күцәжәнә. Уудг усар теткдг көдлмш күцәжәхш. Хамгин түрүнд услврин аһу лаганск районд ткдүлх кергтә. Тиигхлә федеральн бюджетас мөнг авх учр бәәнә. Ямаран кемжән кергтәһинь бичх кергтә. Эннь мелиорацин керг биш, эн төриг коммунальн эдл-аху хаһлх зөвтә. Танһчин правительствла коммнульн эдл-аху эн төриг эс хаһлхла, Лаганя әмтнусн уга үлдх.
Тер саамд Калммелиоводстрой заллтин Хальмгин филиалын директорин үүл даажах Зоя Очирован келсәр, услврин һазрт ус орулхин төлә насосн станцс сәәнәр көдлх зөвтә. Тиигхлә олан малд хот элвгәр белдж авч болх. Хальмгин филиалын директорин үүл даажах Зоя Очирован келсәр, мана систем нег секундт һурв һар кубометр ус орулж чадх, ода болхла зуг өрәл кубометр усн орулгджана. Эн кемжән усна хойр боодгт Рыжково болн Красинское боодгудт күрнә. Талдан боодгуд усн уга. Энүнә төлә цуг насосн станцс сәәнәр көдлх зөвтә. Нег секундт һурвн кубометр ус орулх зөвтә.
Владимир Лиджиевин келсәр, Лаганск района улсиг уудг усар тетклһнә төр ик кезәнәс авн хурц төр болжана. Ода эн төрәр правительствд күүндвр болжана. Энүг хаһлхин төлә олн-зүсн селвгүд орулж өггджәнә. Болв танһчин бюджетд болн бәәрн района хазнд мөнгн уга болад, Лагань —Улан Холл цувгас Красинск усна боодгт насосн станцин дөнгәр ус орулдг арһ уга болжана. Иим ик чинртә төриг бәәрн района улс эврән хаһлх гиж лаганцнр тоолжана.
Ээнән Ольга, Бадмаран Владислав
