Көтчнрә районд школмуд сурһулин шин жилд белдгджәнә
Селән һазрт бәәх школмудын чинр өөдлүлһнә туст газар тетклһнә төр ик нилчән крүгхмн. Көтчнр селәнә ор һанцхн эклц школын герт ода капитальн ясвр көдлмш гүргүдән. Эн школ федеральн программд орсмн. Ода бәәрн сурһульчнр үвлин ик киитнд дааршго. Ода болхла энд сурһулин шин жилд тохнята белдвр кегджәнә.
Көтчнр селәнд ор һанцхн эклц школ бәәнә. Давсн жилд капитальн ясвр кех программд орв. Шинрүлгдсн герт үвләр нүүж орх саам учрв. Кесг жилдән күләжәсн ясвр ода ирж кегдв. Государствин хазнас йилһж өгсн мөнгәр, дула өглһнә систем болн электрокүчин оборудовань сольгдв. Школын директорини дарук Екатерина Манжееван келсәр, ода энд дулан, сарул болв. Гер дотр туалет кев. Эннь бичкдүдт дегд сән болв. Үвлин киитнд көвүд-күүкд һаза һаршго.
Классмудын хораст болхла пол болн дотр ораг бәәрн бюджетин мөнгәр ясх зура бәәсмн. Болв эн жил актов залын сцен бәрлһнд эн мөнгиг йовулхар муниципалитет шиидв. Энүнә төлә жирн минһн арслнг йилһж өггдх. Цөн өдр болад тосхачнр көдлмшән эклх. Екатерина Манжееван келсәр, актов залд сән өдгә цагин некврлә ирлцәтә сцен кех кергтә. Юнгад гихлә нааран олн гиичнр ирнә. Кесг әмтн ирж школ хәләнә. Нег үлү, олн-зүсн школьн керг-үүлдврмүд бүрдәгднә, районд болдг байр бас энд болна.
Района эрдм-сурһулин әнгин көдләчнрин то-дигәр, тер мет Һашун Бурһст селәнә школд бас мөнгнә дөнгәр күргддх. Ода школын гериг автономн газин оборудованяр дулалх. Түрүн һурвн зун минһн арслнг мөнгн расчетн тойгт йовулгдв. Көтнрә района селәдт һаз ирснәс иштә района дәкәд цөн эрдм-сурһулин учрежденьст иим ясвр кегдх зөвтә. Көтчнрә района муниципальн бүрдәцин администрацин әнгин ах специалист Елена Шарапован келсәр, ода районд дөрвн школ газ ирхиг күләжәнә. Удл кимд түлән Көглт, Тугтн, Ергенинский болн Һашун Бурһст селәдин школмудт ирхмн. Ода Һашун Бурһстын селәнә школын герт капитальн ясвр кегджәнә. Энүнә төлә района болн селәнә муниципальн бүрдәцин мөнгн олзлгджана.
Района талдан цуг школмудт жил болһн кедг ясвр кех зура бәәсмн. Ода зәрм школмудын гермүдт ясвр төгсв. Шин мер поселкд школын гер шин герлә әдл болв. Энүг цөн жил хооран тосхж. Ода болхла, школын директор Зурһан Анджукаевин келсәр, шкоолд шин оборудовань углж тәвж, шинрүлх кергтә. Эн төриг ода энд хаһлжана. Иим керг селәнә эрдм-сурһулин учрежденьсиг шинрүлһнә программар күцәгх зөвтә. Школын директор Зурһан Анджукаевин келсәр, хот уудг герин төлә технологическ оборудовань хулдж авхин төлә мөнгн цаглань йилһж өггдв. Тер мет медицинск оборудовань, тер тоод кушетк, ингалятор болн талдань чигн эмчд кергтә аппаратмуд бәәнә.
Дәкәд болхла, района талдан чигн школмудт иим оборудовань болн компьютермуд тәвгдх. Дәкәд нег тодлад келхлә, ода Көтчнрә районд арвн негн школ көдлжәнә. РМО-н эрдм-сурһулин әнгин ах специалист Елена Шарапован келсәр, района эрдм-сурһулин цуг учрежденьс компьютерн оборудовань авла. Эн тоод интерактивн самбр, медицинск оборудовань бас ирв. Энүг федеаральн программар йилһж өгв.
Көтчнрә районд эрдм-сурһулин цуг учрежденьст ясврин көдлмш августын арвн тавн күртл төгсх зөвтә.
Чучян Валентина, Очра Сергей
