Көтчнрә района Шин Мер селәнә школд шунмһа һардач көдлжәнә
Көтчнрә района Шин Мер селәнә бәәрн күн Хальмг танһчин ачта багш гидг күндтә нер зүүжәнә. Бәәрн дундын школын директор ода өдр-бүүрин көдлмшән кежәнә. Сурһулин шин жилд белдвр кех кергтә. Энүнә төлә олн-зүсн бүрдәмжин төрмүд хаһлжана, шин оборудовань углж тәвх кергтә, сурһульчнрин эк-эцкнрлә харһад күүндх төр тәвгджәнә. Энүнд бас дала цаг кергтә болна. Иим кевәр школын директор кесг жилдән көдлжәнә. Зунын амрлһна өдрмүдт амрх саам учрхш, цуг чидлән ода сурһулин шин жилд тусхажана.
Шин Мерин һазр энүнә төрскн энкр һазр болжана. Энд Зурһан Анджукаев төрсмн. Элст балһснд болн талдан чигн балһсдт сурсн кемд оньдин нааран хәрж ирдг бәәсмн. Эн һазр — өвкнриннь һазр. Селә бүрдәсн өвк Анжукад бәәрн әмтн бумб тәвж. Бумбин эргндк бәәрнәс хәләхлә, цуг селән налаһад үзгднә. Цевр киитн усна булгуд, урһмл модна сүүдрт бәәх гермү дик холас дүнгәж үзгднә. Зурһан Анджукаевин келсәр, зер-земш урһаж авдг эрдм бәәрн улсин цуснд бәәх кевтә. Энүнә эцкнь гериннь өөр ке-сәәхн сад урһаж. Ода энүг Зурһан көвүнь килмжән өгч хәләж харжана. Шин Мер селәнә дундын школын директор Зурһан Анджукаевин келсәр, нааран бичкдүднь ирәд альм таслж авх. Энүнәс даву байр бәәхий?
Болв энүнә хамгин һол ухан-санань — бәәрн школ болжана. Түрүн авгтан энд физкультурин багш болж экләд көдлсмн. Энүнә һарт сурсн баһчудын келсәр, иим сән багш тер цагт энд уга бәәсмн. Зурһан Яковлевичин нилчәр школын спортсменмүд районд сән күцәмж бәдг билә. Ода олн-зүсн күндлһнә һашгуд, кубокмуд школьн музейд бәәнә. Тиигхд директорин дарук болж көдлжәсн Зурһан Анджукаев музей бүрдәлһнд ик тәвәцн орулв. Энүнә эцкнь төрскн һазрин туужиг йир сәәнәр меддг бәәж. Тегәд чигн эцкиннь медрл шингәж авсндан ода көвүнь ик ханлтан эцкдән өргжәнә. Школьн музейд Шин Мер һазрин нертә улсин туск материалмуд дала. Теднә негнь нертә гелнг Ванжл гевш. Эн зунар нааран Ванжл гевшин сурһульч, нарта-делкән нертә номт Роберт Турман гиичд ирлә.
Өдгә цагт Зурһан Анджукаев эврәннь аваль Алевтина Эрендженовала эцкиннь герт бәәнә. Ода Шин Мерт эднә өөрхн улснь уга. Тер бийнь эндәс нүүх санан орхш. Зурһан Анджукаевин келсәр, унг угаһар модн урһшго. Күн бас эврәннь унг-тохм медж, иим зангшалар бәәх зөвтә. Тегәд чигн унг-тохмин туужин тускар бичх санан орсмн. Иргч үйнрт иим зөөр олз-туста болх.
Ода школын директор көдлмш уга суужахш. Зунын кемд амрдг цаг күртхш гиж Зурһан Яковлевич келнә. Школын гериг одахн тосхсмн. Тегхд чигн ик ясвр кех керг уга. Тер бйинь школд кех көдлмш дала.
Эрдм-сурһулин федеральн программар цуг оборудовань нааран эс авч ирлтл төвкшгов гиж директор келнә. Ода энүнә зәрминь авч ирв. Хот уудг хорад болн медицинск кабинетд шин оборудовань углж тәвгдв. Цуг бүрдәмжин төрмүдиг сурһулин шин жил эклтл эдн хаһлх саната. Тиигхлә сурһулин кемд багшнр талдан төрмүдт оньган өглго, зуг сурһулин төрт цуг чидлән болн медрлән өгч көдлх. Эш школыг төгсәсн баһчуд жирлһин чик хаалһд орв. Мана иргч бат болх зөвтә гиж Зурһан Анджукаев тоолжана.
Чучян Валентина, Очра Сергей
